पौडी खेल्ने क्रममा डुबेर ३ बालकको मृत्यु

काठमाडौं । सिरहा र महोत्तरीमा पौडी खेल्ने क्रममा डुबेर ३ जना बालकको मृत्यु भएको छ । सिरहामा ६ वर्षीय बालक र महोत्तरीमा ७ र ८ वर्षीय बालकको मृत्यु भएको हो ।

सिरहाको नरहा गाउँपालिका ४ बरछाबा टोल घर भई बरियारपट्टी गाउँपालिका २ जानकीनगरस्थित मामाघर बस्ने ओम प्रकाश रायको छोरा ६ वर्षीय धर्मा रायको बरियारपट्टी गाउँपालिका २ स्थित सार्वजनिक पोखरीमा पौडी खेल्ने क्रममा डुबेर शनिबार दिउँसो मृत्यु भएको छ ।

यस्तै महोत्तरी गौशाला नगरपालिका २ बेचनटोल बस्ने भोला महतोको छोरा ७ वर्षीय अनित महत्तो र जिमदा महत्तोको छोरा ८ वर्षीय सिकिन्दर महतोको सोही ठाउँस्थित महरा खोलामा डुबेर शनिबार दिउँसो मृत्यु भएको छ ।

डुबेर सिकिन्दरको घटनास्थलमै र अनितको प्राथमिक स्वास्थ्य केन्द्र गौशालामा उपचारको क्रममा मृत्यु भएको हो ।