ट्यांकरले मोटरसाइकललाई ठक्कर दिँदा श्रीमतीको मृत्यु, श्रीमान घाइते

काठमाडौं । थापाथलीमा पानी ट्यांकरले मोटरसाइकललाई ठक्कर दिँदा श्रीमतीको ज्यान गएको छ । दुर्घटनामा परेर श्रीमान घाइते भएका छन् ।

माइतीघरबाट थापाथलीतर्फ गुडिरहेको मधेस प्रदेश ०१-००१ क २५१९ नम्बरको ट्यांकरले समान दिशातर्फ गुडिरहेको बा २८ प ४८६७ नम्बरको मोटरसाइकललाई ठक्कर दिँदा मोटरसाइकलको पछाडिको सिटमा बसेकी ६२ वर्षकी सरस्वती तुलाधरको ज्यान गएको हो ।

मोटरसाइकल चालक ६९ वर्षका ध्रुवराज तुलाधरको नर्भिक अस्पतालमा उपचार भइरहेको काठमाडौं उपत्यका ट्राफिक प्रहरी कार्यालयले जनाएको छ । ठक्कर दिने ट्यांकर चालकलाई प्रहरीले पक्राउ गरेको बताइएको छ ।