ग्लोबल टी-२०: सातौ खेलमा भ्यानकुभर नाइट्स विजयी, सन्दीप र दीपेन्द्रको कस्तो रह्यो प्रदर्शन ?

काठमाडौं । ग्लोबल टी-२० क्यानडा लिग अन्तर्गत सातौ खेलमा नेपाली राष्ट्रिय टिमका दुई खेलाडी सहभागी भ्यानकुभर नाइट्स विजयी भएको छ । टस जितेर सुरुमा फिल्ड रोजेको भ्यानकुभरले ५ विकेटको जित निकालेको हो ।

टस हारेर सुरुमा ब्याटिङको निम्तो पाएको मोन्ट्रियल टाइगर्सले १९.२ ओभरमा सबै विकेट गुमाएर १०९ रन बनाएको थियो । उसका लागि अजमातुल्लाह उमरजाईले ३० र शेर्फेन रदरफोर्डले २२ रन जोड्नुबाहेक अन्य ब्याट्सम्यानले राम्रो प्रदर्शन गर्न सकेनन् ।

भ्यानकुभरका लागि नेपालका सन्दीप लामिछानेले महत्त्वपूर्ण २ विकेट लिए । पहिलो विकेटका रुपमा सर्वाधिक रन बनाएका अजमातुल्लाहलाई आउट गरेका सन्दीपले दोस्रो विकेटका रुपमा नवौंक्रमका ब्याट्सम्यान जहुर खानलाई आउट गरेका हुन् ।

सन्दीपले जाहुरको विकेट लिएपछि मेटिन्ट्रयल १०९ रनमा अलआउट भएको थियो । ३.२ ओभर बलिङ गरेका सन्दीपले मात्र १४ रन खर्चिएर २ विकेट लिएका हुन् । एक ओभर बलिङ गरेका दीपेन्द्रले भने बिना विकेट १२ रन खर्चिए । उसका लागि मोहम्मद अमिरले सर्वाधिक तीन विकेट लिए ।

४ ओभर बलिङ गर्दा उनले १८ रन खर्चिएका थिए । ११० रनको लक्ष्य पछ्याएको सन्दीप र दीपेन्द्रको टिम भ्यानकुभरले १८.४ ओभरमा ५ विकेटको क्षतिमा ११३ रन बनायो । भ्यानकुभरको जितका लागि रिजा हेन्ड्रिक्सले सर्वाधिक ३९ रन बनाउँदा कप्तान उस्मान ख्वाजाले ३१ रन जोडे ।

२ बल खेलेका दीपेन्द्र भने नटआउट रहे । यो जितसँगै सन्दीप र दीपेन्द्रको टिम भ्यानकुभरले ग्लोबल टी-२० लिगको यात्रा अन्त्य गरेको छ । समूह चरणाका सबै खेल खेलिसक्दा एक जित र वर्षाले अवरुद्ध खेलमा १ अंक बनाएको भ्यानकुभर तीन अंकसहित तालिकाको पुछारमा छ ।

छैटौ खेलमा आइतबार राति नेपाली राष्ट्रिय टिमका कप्तान रोहितकुमार पौडेल सहभागी टोरोन्टो नेसनल्ससँग भ्यानकुरभर १९ रनले पराजित भएको थियो । उक्त खेलमा नेपालका लेग स्पिन सन्दीप लामिछानेले पूरै ४ ओभर बलिङ गर्दा ३२ रन खर्चिएर एक विकेट हात पारेका थिए ।

यस्तै अलराउण्डर दीपेन्द्रसिंहले २ ओभर बलिङ गर्दा विना विकेट १६ रन खर्चिएका थिए । १२८ रनको लक्ष्य पाएको भ्यानकुभरको लागि नेपालका दीपेन्द्रले १२ बलको सामना गर्दै एक छक्काको मद्तमा १३ रन बनाएका थिए । तीन बलको सामना गरेका सन्दीप भने शून्यमा आउट भए ।

सन्दीपको टिम अन्तिम खेलमा मात्र विजयी भएपनि ग्लोबल टि-२० मा उनको गुग्लीको चर्चा भइरहेको छ । ७ खेलका ६ इनिङ खेलेका सन्दीपले १७० रन खर्चिएर आठ विकेट लिए । ग्लोबल टि-२० को सर्वाधिक विकेट लिने खेलाडीको सूचीमा उनी टप १० मा छन् ।