लिभरपुल २०औँ पटक प्रिमियर लिग च्याम्पियन

काठमाडौँ । आर्लो स्लटको टोली लिभरपुलले इंग्लिस प्रिमियर लिग २०२४–२५ को उपाधि निश्चित गरेको छ । आइतबार राति घरेलु मैदानमा टोटनहमविरुद्ध ५–१ को पुनरागमन जितसहित लिभरपुल चार खेलअगावै प्रिमियर लिग च्याम्पियन बनेको हो ।

योसँगै लिभरपुलले प्रिमियर लिगको इतिहासमा सबैभन्दा धेरै उपाधि जित्ने क्लबमा म्यानचेस्टर युनाइटेडसँग बराबरी गरेको छ । यी दुवै क्लबले हालसम्म समान २० उपाधि जितेका छन् ।

आइतबार १–० ले पछि परेको स्थिति उल्ट्याउँदै लिभरपुललाई जित दिलाउन लुइस डियाज, एलेक्सिस म्याक एलिस्टर, कोडी गाक्पो र मोहमद सालाहले गोल गरे । लिभरपुलले अर्को एक गोल भने टोटनहमका खेलाडीबाट आत्मघाती उपहार पाएको थियो । टोटनहमका डोमिनक सोलान्केले गोल गरे पनि टिमको हार टार्न सकेनन् ।

प्रिमियर लिगमा २०औँ उपाधि निश्चित गरेसँगै स्लटले क्लबका पूर्वप्रशिक्षक योर्गान क्लोपलाई सम्झिए । “अहिले मैले मेरो फोन हेरेँ भने पक्कै पनि योर्गान क्लोपको म्यासेज आएको छ । यो सिजन यसअघि धेरैपटक हामीले एकार्कालाई सन्देश पठायौँ । क्लबमा योर्गान क्लोप र पेप लिन्डेर्सले गरेको काम असाधारण थियो,” स्लटले भने ।