सर्लाहीमा युवकको हत्या गरी शव उखुबारीमा फालिएको अवस्थामा फेला, सात जना पक्राउ

सर्लाही । सर्लाहीको ईश्वरपुर नगरपालिका ८ स्थित उखुबारीमा सडिसकेको अवस्थामा फेला परेको शवको पहिचान चन्द्रनगर गाउँपालिका १, किसनपुर निवासी २८ वर्षीय अरविन्द कुमार पण्डितको रूपमा भएको छ । शवको पहिचान मृतकका दाजु अशोक कुमारले गरेका हुन् ।

वैशाख २४ गतेदेखि बेपत्ता रहेका अरविन्दको हत्या आरोपमा प्रहरीले ईश्वरपुर ६ का सात जनालाई पक्राउ गरेको छ । पक्राउ पर्नेहरूमा चिरानटोल निवासी ४३ वर्षीय मोहम्मद हुसेन मोमिन, २९ वर्षीय मोस्तकिम अन्सारी, २५ वर्षीया नजिमा खातुन, ४० वर्षीय सुयब अन्सारी, २५ वर्षीय कोनुर आलम अन्सारी, ५४ वर्षीय सलाउद्दिन अन्सारी र अन्य एक जना रहेका छन् ।

श्रीमती भगाएको आरोपपछि सुरु भयो दुश्मनी
घटनाको पृष्ठभूमिमा अरविन्दले मोस्तकिम अन्सारीकी श्रीमती नजिमा खातुनलाई भगाएको भन्ने आरोप रहेको छ । चैत १९ गते राति घरबाट बेपत्ता भएकी नजिमा बारे मोस्तकिमले चैत २६ गते इलाका प्रहरी कार्यालयमा खोजीका लागि निवेदन दिएका थिए ।

प्रहरीको खोजीपछि अरविन्द र नजिमा भारत पुगेको पुष्टि भएको थियो । त्यसपछि वैशाख १९(२० गते उनीहरू नेपाल फर्किए । स्थानीय समाजको सहमतिमा नजिमा पुनस् श्रीमान मोस्तकिमसँग बस्न थालेकी थिइन्, तर अरविन्दको निरन्तर आउजाउले परिस्थिति तनावग्रस्त बन्दै गएको प्रहरीको अनुसन्धानले देखाएको छ ।

पूर्व-योजना अनुसार हत्या, शव दोहोरो स्थानान्तरण
प्रहरीका अनुसार वैशाख २८ गते बिहान नजिमाले अरविन्दलाई फूलजोर बाबा मन्दिर नजिक बोलाएकी थिइन् । उनलाई त्यहीँबाट फूलजोर खोला किनारतिर लगेर अन्य आरोपितहरूसँग मिलेर हत्या गरिएको प्रारम्भिक अनुसन्धानबाट खुलेको छ ।

हत्या पश्चात शवलाई सिसौको रुखमुनि घाँस र झाडीले छोपेर राखिएको थियो । तर भोलिपल्ट ९वैशाख २९ गते० घटनाको खुलासा हुने डरले शवलाई ईश्वरपुर ८ स्थित थकरिया चौरीको उखुबारीमा लगेर फालिएको प्रहरीले जनाएको छ ।

प्रमाणसँगै पक्राउ
जेठ २ गते इलाका प्रहरी कार्यालय केशरगञ्जबाट खटिएको टोलीले सबै सात जनालाई पक्राउ गरेको हो । अनुसन्धानको क्रममा मो। हुसेन मोमिनको खुट्टामा मृतकले लगाउने चप्पल फेला परेको पुष्टि मृतकका बाबुबाट गरिएको प्रहरीले जानकारी दिए ।

हाल सातै जनाविरुद्ध सर्लाही जिल्ला अदालतबाट सात दिनको म्याद थप गरी कर्तव्य ज्यान मुद्दामा अनुसन्धान भइरहेको प्रहरी निरीक्षक उमाकान्त जोशीले जानकारी दिएका छन् ।