क्यापिटल क्विन नेपाल-२०२५ को ताज करुणालाई

काठमाडौं । राजधानी निवासी महिलाहरुको सौन्दर्य प्रतियोगिता क्यापिटल क्विन नेपाल २०२५ शनिबार ललितपुरस्थित ज्यापु प्रज्ञा एकेडेमीमा सम्पन्न भएको छ।

जसमा जोरपाटीकी फेसन डिजाइनर करुणा भुजेल श्रेष्ठले विजेताको ताज पहिरिन सफल भएकी छन्। योसँगै उनले फेशन एण्ड इन्टरटेन्मेन्ट इन्टरनेशनल अवार्ड २०२६ को लागि लन्डनमा हुने कार्यक्रमको इन्ट्री प्याकेजसमेत प्राप्त गरेकी छन्।

त्यसैगरी फस्ट रनरअपमा अनिता लामा तथा सीता राई सेकेण्ड अनरअप हुन सफल भएका छन्। हिमालय मुजिजद्वारा आयोजित सो कार्यक्रम, कार्यक्रमको नवौं संस्करण हो।

कार्यक्रमा विविध पेशामा आवद्ध दर्जन बढी प्रतियोगीहरुको सहभागिता रहेको थियो। जसमा प्रतियोगीहरुले करिव तीन सातासम्म व्यक्तित्व विकास, बोलीचाली अभ्यास, स्टेजको प्रस्तुती, क्याटवाक, क्षमता अभिवृद्धि, फोटोसुट, भिडियोसुटलगायतका विषयहरुमा सरिक भइ तालिम लिएका थिए।

सम्पूर्ण प्रतियोगीहरुको ग्रुमिङ गराउने जिम्मेवारी चर्चित फेशन कोरियोग्राफर हिमानी सुब्बाको थियो भने सुब्बा आफैंले प्रतियोगीहरुलाई ओपनिङ पर्फमेन्सको रुपमा आकर्षक नृत्यमा प्रस्तुती गराएकी थिइन्।

प्रतियोगितामा परिचयात्मक चरण,बेस्ट ड्रेस, प्रश्नोत्तर चरण हुँदै प्रतियोगीहरु क्राउनिङ चरणमा पुगेका थिए। फेसन डिजाइनर तथा सौन्दर्यकर्मीहरुको बाक्लो उपस्थिति रहेको सो कार्यक्रम निकै ग्लामरस तथा सटिक देखिन्थ्यो

कोरियोग्राफर हिमानी सुब्बाको सोलो पर्फमेन्स, कलाकारहरुको आकर्षक नृत्य प्रस्तुतीर रहेको कार्यक्रममा विविध सबटाइटल अवार्डसमेत वितरण गरिएको थियो। जसमा बेस्ट ट्यालेन्ट रन्जना सिंह, बेस्ट पर्सनालिटी माया तामाङ, बेस्ट फोटोजेनिक करुणा भुजेल श्रेष्ठ, बेस्ट ड्रेस करूणा भुजेल श्रेष्ठ, मोस्ट डाइनामिक मन्दिरा श्रेष्ठ, मोस्ट स्मार्ट अनिता लामा, मोस्ट डिलीजेन्ट सिता राई, मोस्ट डिलाइटफुल मिना श्रेष्ठ, मोस्ट डिसेन्ट दिना राई, मोस्ट एयाक्टिभ अन्जना राई, मोस्ट चार्मिङ सन्चिता खत्री, मोस्ट प्यासोनेट सजिना तामाङ, मोस्ट डेडिकेटेड गीता राजवंशी, मोस्ट ग्रेसफुल सिताश्री बस्नेत, मोस्ट पपुलर सिताश्री बस्नेत, पब्लिक च्वाइस भिडियो सन्चिता खत्री र बेस्ट मल्टिमिडियातर्फ रन्जना सिंहले हात पार्न सफल भए।

निर्णायक मण्डलतर्फ अभिनेत्री तथा मोडल सुष्मा अधिकारी, फेसन डिजाइनर सुक्निता चौलागाईं, मिस्टर ह्याण्डसम नेपाल २०१९ तथा मोडल अभिषेक खड्का, क्यापिटल क्विन नेपाल २०१६ लिला राई तथा मिसेस डिभा नेपाल २०२५ संगीता अधिकारी रहेका थिए।

महिलाहरुको क्षमता पहिचान गरी सो को प्रस्फुटन गराइ पहिचान बनाउने उद्देश्यले कार्यक्रम आयोजना गरिएको आयोजक पक्षले जानकारी दिएको छ।