काठमाडौं । पुनर्निर्मित धरहरा अब साउन १ गतेदेखि बिहान ८ बजेदेखि बेलुकी ८ बजेसम्म दुई सिफ्टमा सञ्चालन हुने भएको छ। शहरी विकास मन्त्रालयका प्रवक्ता नारायण मैनालीका अनुसार अब सार्वजनिक विदाको दिन पनि धरहरा चढ्न पाइनेछ।

हाल धरहरा बिहान १० बजेदेखि बेलुकी ४ बजेसम्म मात्र खुला हुँदै आएको छ भने बुधबार बन्द गरिँदै आएको छ। अब नागरिकको सुझाव अनुसार सञ्चालन समय बढाइएको हो।

२०७२ को भूकम्पले क्षतिग्रस्त धरहरा पुनर्निर्माणपछि असोज ३ गते परीक्षणका लागि खुला गरिएको थियो भने मंसिर ९ गतेदेखि शुल्कसहित सर्वसाधारणका लागि खोलिएको हो। धरहराको सशुल्क सञ्चालनको सात महिनामा ४ करोड ३३ लाख ९३ हजार ६५० रुपैयाँ राजस्व संकलन भएको छ। यस अवधिमा २ लाख ३७ हजार ६५ जनाले धरहरा अवलोकन गरेका छन्।

धरहरा अब विशिष्ट संरचना सञ्चालन तथा व्यवस्थापन विकास समिति (गठन) आदेश–२०८१ अनुसार सञ्चालन हुँदैछ।