काठमाडौं । सिद्धार्थ बैंक लिमिटेड (SBL) ले गत आर्थिक वर्षको चौथो त्रैमाससम्म वितरणयोग्य मुनाफा अघिल्लो वर्षको तुलनामा ३ गुणा अर्थात् २२० प्रतिशतले बढाएर १ अर्ब ८६ करोड रुपैयाँ पुर्याएको छ। अघिल्लो वर्ष सो अवधिमा यो मुनाफा ५८ करोड रुपैयाँ मात्र थियो।
डिबेन्चर रिडेम्सन रिजर्भमा १ अर्ब ४६ करोड रुपैयाँ छुट्याएपछि पनि बैंकले करिब १३.२२ प्रतिशत लाभांश वितरण गर्न सक्ने आधार तयार भएको छ। समीक्षा अवधिमा बैंकको खुद मुनाफा १०.२४ प्रतिशत बढेर ३ अर्ब ३९ करोड रुपैयाँ पुगेको छ।
बैंकको खुद ब्याज आम्दानी ८ अर्ब ४४ करोड रुपैयाँ (६.४३% वृद्धि) पुगेको छ भने सेवा शुल्क र अन्य आम्दानी १५.०९% बढेर १ अर्ब ६४ करोड रुपैयाँ भएको छ। कुल सञ्चालन आम्दानी ११.८२% वृद्धि भई ११ अर्ब १६ करोड रुपैयाँमा पुगेको छ।
निक्षेप संकलन १६.१६% बढेर २ खर्ब ८० अर्ब रुपैयाँ पुगेको छ भने कर्जा लगानी ९.७६% बढेर २ खर्ब १४ अर्ब रुपैयाँ भएको छ। बैंकको चुक्ता पूँजी १४ अर्ब ९ करोड र जगेडा कोष १६ अर्ब ९० करोड रुपैयाँ रहेको छ।असार मसान्तसम्म बैंकको प्रतिशेयर आम्दानी २४ रुपैयाँ १० पैसा र प्रतिशेयर नेटवर्थ २१९ रुपैयाँ ९७ पैसा पुगेको छ। खराब कर्जा २.६२% मा सीमित छ भने आधार ब्याजदर घटेर ६.४२% र स्प्रेडदर ३.९८% कायम भएको छ।
बैंकले सूचकहरूमा देखिएको सुधारलाई रणनीतिक सफलताको परिणाम मानेको छ र केही ऋणपत्र परिपक्व भएपछि आगामी वर्ष मुनाफामा थप वृद्धि हुने अपेक्षा राखेको छ।
