काठमाडौं । एप्पलले अमेरिकी उत्पादन कार्यक्रम (एएमपी)मा ठूलो लगानी गर्ने घोषणा गरेको छ, जसले अमेरिकामा उन्नत उत्पादन ल्याउने लक्ष्य राखेको छ।

यसैलाई ध्यानमा राख्दै एप्पलका सीईओ टिम कुकले ह्वाइट हाउसको पत्रकार सम्मेलनमा अमेरिकी राष्ट्रपति डोनाल्ड ट्रम्पलाई विशेष र कस्टम मेड उपहार दिएका छन् । यो उपहार गोल आकारको गिलास (आईफोन गिलास निर्माण गर्ने कम्पनी कर्निङले बनाएको) र २४ क्यारेट सुनको आधार बनाइएको हो। टिम कुकले यो टुक्राको एउटा मात्र युनिट बनेको र यो पूर्ण रुपमा अमेरिकामा डिजाइन र निर्माण भएको बताए ।

टिम कुकले ह्वाइट हाउसमा आयोजित पत्रकार सम्मेलनमा ट्रम्पलाई आगामी चार वर्षमा ६०० अर्ब डलरको लगानी योजना घोषणा गर्दा यो उपहार दिएका हुन् । यस लगानीको मुख्य उद्देश्य एप्पलको आपूर्ति श्रृंखला र उन्नत उत्पादन केन्द्रलाई अमेरिकामा सार्नु हो।

स्टेजमा उपहारका विशेषताहरू साझा गर्दै कुकले भने कि यसमा कोर्निङद्वारा निर्मित राउन्ड गिलास छ जसमा ‘राष्ट्रपति डोनाल्ड ट्रम्प, ठूलो एप्पल लोगो, टिम कुकको हस्ताक्षर, मेड इन युएसए र वर्ष २०२५’ कोरिएको छ।

यो डिजाइन हाल एप्पलमा कार्यरत एक पूर्व अमेरिकी मरीन कोर्प्स कर्पोरलले तयार पारेको हो। गिलास समात्न प्रयोग गरिएको २४  क्यारेट सुनको आधार युटाबाट आउँछ। यसको सही तौल उल्लेख नभए पनि रोयटर्सका अनुसार सुनको हालको मूल्य प्रति औंस ३ हजार ३ सय अमेरिकी डलरभन्दा बढी छ ।

यो उपहार ट्रम्प र एप्पलबीचको सम्बन्धलाई मजबुत बनाउने प्रयास भएको विज्ञहरुको विश्वास छ । हालैका महिनाहरूमा ट्रम्पले चीन र भारतमा उत्पादनमा असन्तुष्टि व्यक्त गरेका थिए र चेतावनी दिएका थिए कि यदि एप्पलले अमेरिकामा उत्पादन ल्याएन भने भन्सार बढाउने छ। टिम कुकले भने कि यो नयाँ कार्यक्रम १० भन्दा बढी अमेरिकी र विश्वव्यापी कम्पनीहरूसँग साझेदारीमा चल्नेछ।