तुइन खोलाको पहिरो हटाउन समय लाग्ने

काठमाडौं । मुग्लिन–नारायणगढ सडकखण्डको तुइन खोला पुलनजिकै गएको पहिरो हटाउन समय लाग्ने भएको छ । बुधबार साँझ परेको वर्षातका कारण पहिरो पन्छाउन समस्या भएपछि थप समय लाग्ने भएको सडक डिभिजन कार्यालय भरतपुरले जनाएको छ ।

“आज बिहान ५ः३० बजेदेखि पहिरो पन्छाउन नारायणगढ र मुग्लिनतर्फबाट पाँचवटा उपकरण निरन्तररूपमा परिचालन भइरहेको छ,” कार्यालयले भनेको छ, “तर, साँघुरो ठाउँका कारण धरै उपकरणहरू एकैपटक संचालनमा ल्याई कार्य गर्न सकिएको छैन । यसले पहिरो पन्छाउन समय लाग्ने भएको छ ।”

सडक आवागमन पूर्णरूपमा सुचारू नहुन्जेलसम्म उक्त सडक प्रयोग नगर्न कार्यालयले आग्रह गरेको छ । मंगलबारदेखि यो सडकखण्ड पूर्णरूपमा अवरुद्ध छ ।