विद्युत सर्टबाट मिर्जापुरमा आगलागी, गोठ जलेर नष्ट

सर्लाही । सर्लाहीको बलरा नगरपालिकाको मिर्जापुरमा बुधबार बिहान गोठमा आगलागी हुँदा करिब डेढ लाख रुपैयाँ बराबरको क्षति भएको छ। बलरा नगरपालिका ६ मिर्जापुरस्थित नन्दलाल साहको फुसको गोठमा बुधबार बिहान करिब २ बजेको समयमा विद्युत सर्ट भई आगलागी भएको सर्लाही प्रहरीले जनाएको छ ।

आगलागीबाट गोठसहित गोठभित्र भण्डारण गरिएको अन्न, कपडा तथा अन्य सर सामाग्री पूर्ण रूपमा जलेर नष्ट भएको छ । प्रहरीका अनुसार आगलागीबाट एक लाख ४६ हजार रुपैयाँ बराबरको धनमाल क्षति भएको छ । घटनामा एउटा पाडो मरेको छ भने एक बाख्रा र एक भैँसी जलेर घाइते भएका छन् ।

आगलागी भएपछि घरधनीसहित छिमेकीहरूले तत्कालै आगो नियन्त्रणको प्रयास गरेका थिए । प्रयासकै क्रममा भैँसी र बाख्रालाई जोगाउन सफल भएपनि गोठभित्र रहेका अन्य सर सामाग्री भने बचाउन नसकिएको प्रहरीले जनाएको छ ।