काठमाडौं । नेपाल टेलिकमले २०८२ सालको एसईई परीक्षमा सहभागी हुने विद्यार्थीहरुका लागि विशेष एसईई अफर २०८२ ल्याएको छ । यस योजना अन्तगर्त नयाँ सिमकार्ड लिन चाहने विद्यार्थीले सजिलै सिम प्राप्त गर्न सक्नेछन् भने हाल प्रयोगमा रहेका सिममा पनि यो अफर सक्रिय गर्न सकिने व्यवस्था गरिएको छ ।
एसईई अफर आजदेखि सुरु भई २०८३ साल असार २६ गतेसम्म लागु रहनेछ । मात्र रु २० रुपियाँमा नयाँ सिमकार्ड नेपाल टेलिकमका देशभरका कार्यालयहरुबाट लिन सकिनेछ । नयाँ सिमकार्ड सक्रिय गरेपछि ३० दिनसम्म विभिन्न सेवा लिन सकिन्छ । नयाँ सिमकार्डमा मेन व्यालेन्सको रुपमा उपलब्ध हुने रु ९.८० रुपियाँबाट कल, एसएमएस र डाटा चलाउन सकिने छ ।
एसईई प्याकेज अन्तगर्त विद्यार्थीहरुले दैनिक २० मिनेट अन-नेट कल, १० ओटा एसएमएस र ५०० एमबि डाटा पाउनेछन् । यी सुबिधा दैनिक आधारमा मात्र मान्य हुनेछन् । यसैगरी रु ५० वा सोभन्दा बढीको रिचार्ज गर्दा अतिरिक्त बोनस स्वरुप ५०० एमबि डाटा, ५० मिनेट कल र ५० ओटा एसएमएस उपलब्ध हुनेछ भने यो बोनस ३ दिनभित्र प्रयोग गरिसक्नु पर्दछ ।
नयाँ सिम लिनका लागि परीक्षार्थीले प्रवेशपत्र , कक्षा १० को मार्कसिटको प्रतिलिपि, फोटो तथा परिचय खुल्ने कागजात पेश गर्नुपर्नेछ । सिम सक्रिय गर्न *१४१४# र अफर लिन * १६००# डायल गर्नुपर्नेछ । पुरानो सिम प्रयोगकर्ताले पनि * १६००# डायल गरी आफ्नो एसईई सिम्बोल नम्बर र जन्ममिति (YYMMDD ढाँचामा) प्रविष्ट गरेर अफर लिन सक्नेछन् ।
गत वर्षजस्तै यस वर्ष पनि विद्यार्थीहरुलाई लक्षित गरी ल्याइएको यो योजना अध्ययनका क्रममा सञ्चार सेवामा सहजता ल्याउने उदेश्यका साथ सञ्चालन गरिएको कम्पनीले जनाएको छ ।
