कालंगा हाइड्रोको आईपीओमा २ अर्बभन्दा बढी आवेदन

काठमाडौं । कालंगा हाइड्रो लिमिटेड को सर्वसाधारणतर्फ निष्काशन गरिएको आईपीओमा २ अर्ब २५ करोडभन्दा बढी रकम बराबरको आवेदन परेको छ । सिडिएसका अनुसार जेठ १० गते साँझ ५ बजेसम्म १७ लाख ७९ हजार ५९३ आवेदकबाट २ करोड २५ लाख २५ हजार २९० कित्ता शेयरका लागि आवेदन परेको हो ।

कम्पनीले यसअघि आयोजना प्रभावित स्थानीय र वैदेशिक रोजगारीमा रहेका नेपालीलाई आईपीओ बाँडफाँड गरिसकेको छ । अब सर्वसाधारणका लागि आईपीओ बिक्री खुला गरिएको हो ।

कम्पनीले १ अर्ब ४० करोड रुपैयाँ जारी पूँजीको ३५ प्रतिशत बराबर ४९ लाख कित्ता आईपीओ निष्काशन गर्न अनुमति पाएको थियो । जसमध्ये १४ लाख कित्ता आयोजना प्रभावित र ३ लाख ५० हजार कित्ता वैदेशिक रोजगारीमा रहेका नेपालीलाई बाँडफाँड भइसकेको छ ।

बाँकी शेयरमध्ये १ लाख ७५ हजार कित्ता सामूहिक लगानी कोष र १ लाख ५ हजार कित्ता कर्मचारीका लागि सुरक्षित गरी बाँकी २८ लाख ७० हजार कित्ता सर्वसाधारणका लागि बिक्रीमा ल्याइएको हो । आईपीओमा न्यूनतम १० कित्तादेखि अधिकतम २० हजार कित्तासम्म आवेदन दिन सकिने व्यवस्था गरिएको छ । माग अनुसार आवेदन नपरेमा निष्काशन अवधि जेठ २२ गतेसम्म लम्बिन सक्ने कम्पनीले जनाएको छ ।

कम्पनीको धितोपत्र निष्काशन तथा बिक्री प्रबन्धक सानिमा क्यापिटल लिमिटेड रहेको छ ।