एसियन गेम्स छनोटमा कुशल भुर्तेलको ऐतिहासिक कीर्तिमान

काठमाडौं । नेपाली राष्ट्रिय क्रिकेट टोलीका विस्फोटक ओपनर कुशल भुर्तेलले एसियन गेम्स छनोट प्रतियोगिताअन्तर्गत चीनविरुद्धको खेलमा ऐतिहासिक उपलब्धि हासिल गरेका छन्। उनले एकै ओभरमा लगातार ६ छक्का प्रहार गर्दै नेपाली क्रिकेटमा नयाँ कीर्तिमान कायम गरेका हुन्।

भुर्तेलले इनिङ्सको नवौं ओभरमा विपक्षी बलरका सबै ६ बललाई सीमा रेखापार पठाउँदै दुर्लभ उपलब्धि आफ्नो नाममा दर्ज गरे। क्रिकेट इतिहासमा एकै ओभरमा ६ छक्का प्रहार गर्ने खेलाडीको सूचीमा उनी नेपालका दोस्रो खेलाडी बनेका छन्।

यसअघि सन् २०२३ मा एसीसी प्रिमियर कपअन्तर्गत कतारविरुद्धको खेलमा दीपेन्द्रसिंह ऐरीले अन्तिम ओभरमा लगातार ६ छक्का प्रहार गर्दै यस्तो कीर्तिमान बनाएका थिए।

चीनविरुद्धको खेलमा भुर्तेलको आक्रामक ब्याटिङले नेपाललाई बलियो अवस्थामा पुर्याएको थियो। उनको यो उपलब्धिलाई नेपाली क्रिकेट इतिहासको स्मरणीय क्षणका रूपमा हेरिएको छ।