ग्यास आपूर्तिमा सुधार, भोलिदेखि १४.२ केजीको फुल सिलिन्डर बिक्री सुरु

काठमाडौं । नेपाल आयल निगम लिमिटेडले देशभर भोलिदेखि १४.२ केजी क्षमताको पूर्ण एलपी ग्यास सिलिन्डरको बिक्री–वितरण पुनः सुरु गर्ने भएको छ। भारतीय आयल निगम (आईओसी) का विभिन्न बोटलिङ प्लान्ट तथा रिफाइनरीबाट ग्यास आपूर्ति सहज बन्दै गएपछि साबिककै व्यवस्थाअनुसार पूर्ण क्षमताको सिलिन्डर बजारमा उपलब्ध गराउने निर्णय गरिएको निगमले जनाएको छ।

यसअघि ग्यासको माग अत्यधिक बढ्नुका साथै आपूर्तिमा देखिएको दबाबलाई व्यवस्थापन गर्न निगमले उद्योगहरूलाई ७.१ केजी क्षमताका (आधा) सिलिन्डर मात्रै बिक्री–वितरण गर्न निर्देशन दिएको थियो। अब भने आपूर्ति अवस्थामा सुधार आएपछि उपभोक्ताले पुनः १४.२ केजी क्षमताको पूर्ण सिलिन्डर खरिद गर्न सक्नेछन्।

निगमका अनुसार १४.२ केजी क्षमताको एलपी ग्यास सिलिन्डरको उपभोक्ता मूल्य २,०६० रुपैयाँ कायम गरिएको छ।

केही समयसम्म ७.१ केजी र १४.२ केजी दुवै क्षमताका ग्यास सिलिन्डर बजारमा उपलब्ध रहने निगमले जनाएको छ। ७.१ केजीका सिलिन्डर पूर्ण रूपमा बजारबाट हटिनसकेकाले दुवै प्रकारका सिलिन्डर समानान्तर रूपमा बिक्री–वितरण हुने बताइएको छ।