सुनको मूल्य एकैदिन प्रतितोला ५ हजार ८ सय रुपैयाँले घट्यो, कतिमा हुँदैछ कारोबार ?

काठमाडौं । अन्तर्राष्ट्रिय बजारमा बहुमूल्य धातुको मूल्यमा आएको तीव्र गिरावटको प्रभाव नेपाली बजारमा पनि देखिएको छ। शुक्रबार स्थानीय बजारमा सुन र चाँदी दुवैको मूल्य उल्लेख्य रूपमा घटेको नेपाल सुनचाँदी व्यवसायी महासंघले जनाएको छ।

महासंघका अनुसार छापावाल सुनको मूल्य प्रतितोला ५ हजार ८ सय रुपैयाँले घटेर २ लाख ८५ हजार ५ सय रुपैयाँ कायम भएको छ। बिहीबार सुन प्रतितोला २ लाख ९१ हजार ३ सय रुपैयाँमा कारोबार भएको थियो।

त्यस्तै, १० ग्राम सुनको मूल्य पनि घटेर २ लाख ४४ हजार ७ सय ७० रुपैयाँमा कायम भएको छ। अन्तर्राष्ट्रिय बजारमा सुनको मूल्य ओरालो लागेसँगै स्थानीय बजारमा पनि त्यसको प्रत्यक्ष असर परेको व्यवसायीहरू बताउँछन्।

चाँदीको मूल्यमा पनि गिरावट देखिएको छ। शुक्रबार चाँदी प्रतितोला १ सय ५५ रुपैयाँले घटेर ४ हजार ३ सय ५० रुपैयाँमा कारोबार भइरहेको छ। अघिल्लो दिन चाँदीको मूल्य प्रतितोला ४ हजार ५ सय ५ रुपैयाँ थियो।

अमेरिकी डलरको मजबुती, अन्तर्राष्ट्रिय बजारमा लगानीकर्ताको बदलिएको धारणा तथा बहुमूल्य धातुमाथि बढेको बिक्री दबाबका कारण विश्व बजारमा सुन–चाँदीको मूल्य घटिरहेको छ। यही प्रभावका कारण नेपाली बजारमा पनि बहुमूल्य धातुको मूल्यमा उल्लेख्य कमी आएको हो।