नेपाल र नेपालीले जब सम्म बिदाको मानसिकता त्याग्दैनन् तब सम्म आर्थिक प्रगति सम्भव छैन l हुन त हामी भन्दा बढी समय विदेशीहरु मोजमस्ती र मनोरन्जनमा बिताउछन् l वर्षको एक महिना घर बिदा लिएर उनीहरु घुम्न निस्कन्छन् तर हामी कहाँ वर्ष भरि काम गरे पछि एक पटक लामो बिदा लिएर घुम्न जाने परिपाटी छैन l निजामती सेवा नियमावलीले वर्षको ३० दिन घर बिदा र लामै बिरामी बिदा तथा पर्व बिदा दिन गर्छ तर हामी बिदाहरू व्यवस्थित तरिकाले मनाउन सकिरहेका छैनौ l
खासमा धेरै जसो सरकारी कार्यालयहरु कर संकलन गर्ने निकाय भएकाले लामो समय बिदा दिने कार्यले सेवा प्रभाहमा मात्र नभई कर संकलनमा समेत असर गरिरहेको हुन्छ l राज्यको यस्तो महत्वपूर्ण विषयमा असर पर्ने हुदा विदाको बिषयमा गम्भीर छलफल हुनु आजको आवश्यकत्ता भईसकेको छ l हामी सेवा दिन बसेका हौ, हामीले सेवा दिनु पर्छ भन्ने मानसिकता कर्मचारीहरुमा पाइदैन l हामी कार्यालयका हाकिम वा कर्मचारी हौ, हामीले शासन गर्न पाउनु पर्छ भन्ने मानसिकता उनीहरुमा देख्न सकिन्छ l सेवाग्राही आएकाले सरकारलाई आम्दानी भइरहेछ, हामीले समेत काम पाइरहेका छौ भन्ने मानसिकता उनीहरुमा कतैपनि देखिदैन l
सरकारी निकायहरुमा सबैभन्दा बढी व्यवस्थित मानिएको अदालतमा समेत चित्त बुझ्दो सेवा प्रवाह गरिरहेको पाईदैन भने कुनै योजना एवम् कार्य सुची नभएका कार्यालयको काम व्यवस्थित हुन्छ भंनेर सोच्नु हाम्रो मुर्खता हुनेछ l समयको अन्तराल सगै व्यवस्था बदलिसकेको छ तर कार्य शैली यथावत छ l
‘राजाको काम कहिले जाला घाम’ भन्ने पहिलेको उखान परिवर्तन भई ‘जनताको काम कहिले डुब्ला घाम’ भइसक्यो तर हाम्रो सोच बदलिएको छैन l हामीमा रहेको यस्तो मानसिकतालाई कहिले त्याग्ने ? सार्वजनिक बिदा ब्यबस्थित गर्न पर्व बिदा तथा दिवसहरु मनाउन दिने बिदा कट्टा गर्नु आजको आवश्यकत्ता बनिसकेको छ l यो त औपचारिक बिदाको कुरा मात्र भयो l यहाँ हिउदको समयमा कर्मचारी पाउन मुस्किल पर्छ l उनीहरु की त घाम तापिरहेका हुन्छन् या हाजिर गरेर टाप कसिसकेका हुन्छन् l
त्यसमाथी कार्यालय प्रमुखले बिदा बस्न अनुमती दिएको अवस्थामा सेवा प्रभाहमा व्यापक असर परेको देख्न सकिन्छ l दशैमा पन्ध्र दिन लामो बिदा, साउनमा बर्षे बिदा, जाडोमा चिसो बिदा र गर्मीमा काम गर्न नसक्ने परिपाटीले सेवाग्राही मर्कामा परेको पाइन्छ l सरकारी कार्यालयहरुमा जनताले बेहोर्ने सास्ती को कुरा गर्ने हो भने दिउसो एकछिन खटिने कर्मचारीहरुले ट्याक्सी खर्च, खाजा खर्च एवम् आफ्ना केटाकेटीलाई उपहार दिन लाग्ने खर्च खोजिरहेका हुन्छन् l ल भन्नुस त यस्तो मानसिकताले देश विकासको गतिमा लम्कन सक्छ होला र ?
