जापान रोजगारका लागि भाषा र सीप परीक्षाको मिति तोकियो

 काठमाडौं | जापान रोजगारको लागि आगामी अक्टोबर २७ र २८ मा भाषा परीक्षा हुने मिति तय भएको छ । 

जापानले पहिलो चरणमा केयर गिभरका लागि कामदार लैजान भाषा परीक्षा गर्न लागिएको श्रम तथा रोजगार मन्त्रालयले जानकारी दिएको छ । अक्टोबरमा भाषा परीक्षा र त्यसलगत्तै सीप परीक्षा हुनेछ । सीप परीक्षा नोभेम्बर ६ र ७ मा हुने तय भएको छ । 

उक्त भाषा परीक्षामा उत्तीर्ण भएकाहरु मात्र सीप परीक्षाका लागि योग्य हुनेछन् । सीप परीक्षा उत्तीर्ण भएको २ महिनाभित्र कामदार जापान जानेछन् । मन्त्रालयले परीक्षाको मिति तोकिएपनि प्रक्रिया कस्तो हुने, केयर गिभरका लागि कति जनशक्ति लैजाने भन्ने बिषयमा टुङ्गो लागेको छैन । 

नेपालले गत चैत ११ मा नेपाली कामदार जापान लैजाने विषयमा सम्झौता गरेको थियो । सोही सम्झौता अनुसार पहिलो चरणमा केयर गिभरको लागि जनशक्ति लैजान लागेको हो । उक्त सम्झौता अनुसार जापानको विभिन्न १४ क्षेत्रमा नेपाल सहित बिभिन्न ९ देशबाट कामदार लैजाने तय भएको थियो । उक्त सम्झौतामा नेपालका तर्फबाट श्रम रोजगार तथा सामाजिक सुरक्षा मन्त्रालयका सचिव महेशप्रसाद दाहाल र जापानी राजदूत मासासी ओगवाले हस्ताक्षर गरेका थिए । 

गत बैशाखमा जापान सरकारले रोजगारका लागि किटान गरेका १४ वटा क्षेत्रमध्ये नेपालले तत्काल पठाउन सक्ने श्रमिकको सीपयुक्त क्षेत्रको श्रमिक जनशक्ति विवरण माग गरेको थियो । 

जापान सरकारले विदेशी श्रमिकले जापानमा गर्नुपर्ने काम कृषि, मत्स्यपालन, औद्योगिक क्षेत्र, होटल, रेष्टुरेन्ट, पर्यटन निर्माण, नर्सिङ, केयरगिभर व्यवसायलगायत १४ वटा क्षेत्रभित्र रहेर कामको विवरण पठाउन माग गरेको थियो ।