चितवन । चार दिनसम्म चितवन प्रदर्शनी केन्द्र भरतपुरमा चलेको चौथो राष्ट्रिय कृषि यान्त्रीकरण प्रदर्शनी २०७६ सोमबारदेखि सकिएको छ । ‘कृषिमा रुपान्तरण, कृषिमा यान्त्रीकरण’ भन्ने मूल नाराका साथ भएको प्रदर्शनीमा दर्शकको उत्साहजनक सहभागिता रहेको थियो ।
प्रदेश नम्बर ३ का भूमि, व्यवस्था, कृषि तथा सहकारी मन्त्री दावा दोर्जे लामाले एक कार्यक्रमका बीच प्रदर्शनी समापनको घोषण गरेका थिए । प्रदर्शनीमा कृषि सम्बन्धी आधुनिक प्रविधि, विभिन्न कृषि औजार, यन्त्र उपकरणहरु राखिएको थियो ।
हरेक दुई दुई वर्षको अन्तरमा गरिने यस प्रदर्शनी २०७० सालमा चितवनबाट नै शुरु भएको थियो । २०७२ सालमा बाँके, कोहोलपुर, २०७४ सालमा काठमाडौं हुँदै पुनः चौथो प्रदर्शनीको रुपमा चितवनमा सम्पन्न गरिएको हो ।
प्रदर्शनीमा लक्षित वर्गका कृषक, नीति निर्माता, उद्यमी, व्यवसायी, सरकारी एवं गैह्र सरकारी सस्थांहरु, कृषक समूह, कृषि सहकारी संस्था, शिक्षक तथा विद्यार्थीहरुलाई नेपालमा भित्रिएका कृषि यन्त्र र उपकरणहरुको बारेमा जानकारी प्रदान गरिएको थियो ।
मंसिर ६ गतेदेखि भएको प्रदर्शनीलाई कृषि तथा पशुपन्छी विकास मन्त्रालय, कृषि विभाग, कृषि पूर्वाधार विकास तथा कृषि यान्त्रीकरण प्रवद्र्धन केन्द्र, प्रधानमन्त्री कृषि आधुनिकीकरण परियोजना, भूमी व्यबस्था, कृषि तथा सहकारी मन्त्रालय प्रदेश नं ३ र नेपाल कृषि मेशिनरी व्यवसायी संघले आयोजना गरेका थिए । प्रदर्शनीमा चितवन उद्योग संघ सहयोगी संस्थाको रुपमा रहेको थियो ।
