काठमाडाैं । एमाले अध्यक्ष केपी शर्मा ओलीले माधव कुमार नेपाल समूहका नेता घनश्याम भुसाल र सुरेन्द्र पाण्डेलाई पार्टीबाट ६ महिनाका लागि निलम्बन गरेका छन् । बुधबार नेताद्वयले पठाएको जवाफमा पार्टी अध्यक्षलाई नै स्पष्टीकरण सोधिएको भन्दै दलबाट निलम्बन गरिएको हाे । दुवै नेतालाई समान व्यहाेराकाे पत्र पठाई निलम्बन गरिएकाे हाे ।
‘तपाईले पार्टी एकतालाई विखण्डन गर्ने, पार्टी फुटाउने, पार्टीभित्रको सहकार्य र सद्भावलाई क्षतविक्षत पार्ने गरी निरन्तर अवैधानिक गुट भेला गर्ने, उक्त कार्यलाई निरन्तरता दिने स्वीकारोक्ति सहित अहंकार र आत्म केन्द्रित कुरा उल्लेख गरी स्पष्टीकरण जवाफ दिएको देखियो,’ बिहीबार दुई नेतालाई गरिएको कारबाही पत्रमा भनिएको छ ।
स्पष्टीकरणमा सोधिए अनुसार आफ्नो भुलत्रुटि स्वीकार नगरेको ओलीले पत्रमा उल्लेख गरेका छन् । ओलीले कारबाही पत्रमा ‘कुनै आत्मसमीक्षा नगरिएको, आत्मआलोचना गर्ने कुनै प्रवृत्ति नदेखिएको, अहंकार आत्मकेन्द्रित र स्वार्थी प्रवृत्ति प्रष्ट रुपमा देखियो । आफ्नो स्वार्थका लागि देश जनता र पार्टीको हितलाई जस्तो सुकै क्षति पुर्याउन तयार भएको आपराधिक मनोवृत्ति प्रष्ट रुपमा थप पुष्टि भएको’ लेखेका छन् ।
उनीहरुले आपराधिक कृयाकलाप नस्वीकारेको आरोप समेत पत्रमा लगाइएको छ । भुलसुधार गर्ने तथा विगतमा गरिएका गलत कार्यप्रति प्रायश्चित नगरिएको पत्रमा उल्लेख छ । ‘प्रायश्चित गर्ने अवसरलाई त्यसै गम्भीरताका साथ लिनुको साटो तपाईले उल्टै स्पष्टीकरण सोध्ने जस्तो अनधिकृत र हास्यास्पद कार्य गरेको देखियो,’ पत्रमा भनिएको छ । उनीहरुको कार्यले पार्टीमा गुटगत क्रियाकलाप भएको ओलीको पत्रमा उल्लेख छ ।
दशौं महाधिवेशन आयोजक कमिटी सदस्य, पार्टीका सबै जिम्मेबारीबाट ६ महिनाका लागि निलम्बन गरिएको छ । उनीहरुलाई प्रतिनिधि सभासदस्य पद भने कायम रहने गरी कारबाही गरिएकाे छ । दशौं महाधिवेशन आयोजक कमिटीलाई माधव नेपाल पक्षले अवैधानिक भन्दै अस्वीकार गर्दै आएको छ ।
पार्टी अध्यक्षको तर्फबाट महासचिव ईश्वर पोखरेलले चैत ८ मा सोधेको स्पष्टीकरण पत्रको जवाफ तीन दिनभित्र दुवै नेताले नबुझाएपछि पुनः चैत १६ मा पत्र लेखिएको थियो । भुसाल र पाण्डेले बुधबार लामो स्पष्टीकरण बुझाउँदै ओली नै पार्टी फुटवादी भएको आरोप लगाएका थिए ।
