काठमाडौं उपत्यकामा हाइ अलर्ट ! किन बढाइयो सुरक्षाकर्मी ?

काठमाडौं । प्रधानमन्त्री केपी शर्मा ‌ओलीलाई अपदस्त गर्ने गरी आएको सर्वोच्च अदालतको फैसलासँगै सुरक्षा तैनाथी बढाइएको छ । सर्वोच्च अदालतले प्रधानमन्त्री ओलीका विपक्षमा फैसला सुनाएपछि ओली समर्थक अहिले अदालतको फैसलाको विरुद्ध सकडकमा उत्रिएका छन् ।

विरोध, प्रर्दशन र झडप हुनसक्ने सम्भावना बढेपछि काठमाडौं उपत्यकाभित्र थप सुरक्षाकर्मी परिचालन गरिएको छ । ‘सुरक्षाकर्मीलाई अलर्ट गरिएको छ । प्रदर्शन, विरोध हुन सक्ने स्थानमा थप सुरक्षाकर्मी परिचालन गरिएको छ,’ महानगरीय प्रहरी कार्यालय, रानीपोखरीका प्रहरी प्रमुख एआइजी हरिबहादुर पालले भने ।

नेकपा एमालेको भातृ संगठन युवा संघले माइतीघरमा विरोध प्रदर्शन गरेको छ । त्यस्तै, साँझ जुलुस निकाल्ने तयारीको समेत सूचना पाएको प्रहरीले सुरक्षाकर्मी र सादा पोशाकमा समेत मुभ गराएको छ । प्रहरी स्रोतका अनुसार सुरक्षा थ्रेट हुन सक्ने व्यक्ति, घर र कार्यालयमा समेत सुरक्षाकर्मीको निगरानी बढाइएको छ ।

राजनीतिक दलका नेता, सर्वोच्च अदालतका न्यायाधीश, अधिवक्ता लगायत माथि सुरक्षा थ्रेट बढी रहेको एसिसमेन्टका आधारमा सुरक्षा निगरानी बढाइएको हो । त्यस्तै, अदालतको आसपासमा थप सुरक्षाकर्मी परिचालन गरिएको छ ।