मोरङमा गुडिरहेको बसभित्र एसिड पोखिँदा ५ घाइते

काठमाडौं । मंगलबार दिउँसो कटहरी गाउँपालिकामा रंगेली जाँदै गरेको बसभित्र एसिड पोखिँदा पाँच जना घाइते भएका छन् ।

जिल्ला प्रहरी कार्यालयका प्रहरी नायब उपरीक्षक दीपक श्रेष्ठलका अनुसार १ ख ३९८१ नम्बरको बसभित्र कटहरी-४ बस्ने २५ वर्षीय सुन पसल सञ्चालक राहुल साहले प्लास्टिकको बोतलमा एसिड बोकेका थिए । बसमा ब्रेक लागेपछि उनको हात थिचिएर बोतलको बिर्को खुली एसिड पोखिएको जनाइएको छ ।

मोरङको सुनवर्षी नगरपालिका-४ की २२ वर्षीया निता राजवंशी, २२ वर्षीया सविहा खानम, धनपालथान गाउँपालिका–५ का ४२ वर्षीय ओमनारायण राजवंशी, सुनसरी बराहक्षेत्र नगरपालिका-८ का ४० वर्षीया सुमित्रा उराव र भोजपुरको अरूण गाउँपालिका-१ याङपाङका २० वर्षीय विनोद परियार घाइते छन् ।

परियार सो गाडीका सहचालक समेत हुन् । घाइतेहरूको सामान्य उपचारपछि डिस्चार्ज भएको तर हालसम्म सुन पसल सञ्चालक भने फरार छन् ।