अख्तियारको निरीक्षक भन्दै पैसा असुल्ने तीन पक्राउ

काठमाडौँ । महोत्तरीको जलेश्वर नगरपालिका–१२ सीमा क्षेत्रमा नेपाल–भारत आउजाउ गर्नेसँग आफू अख्तियारको प्रहरी निरीक्षक हुँ भन्दै पैसा असुल्ने तीन जना पक्राऊ परेका छन् ।

पक्राउ पर्नेमा जलेश्वर–१२ का ३० वर्षीय रवि ठाकुर, लोहारपट्टी नगरपालिकाका २९ वर्षीय प्रभास झा र २१ वर्षीय हमिद राईन रहेका छन् । प्रहरी नायब उपरीक्षक प्रकाश विष्टका अनुसार तीनै जनालाई बिहीबार साँझ जलेश्वर–१२ नैन्ही गाउँस्थित सीमानाकाबाट पैसा असुली गरिरहेको अवस्थामा प्रहरीचौकी नैन्ही र सशस्त्र प्रहरी बल नेपाल बीओपी जलेश्वरको टोलीले पक्राउ गरेको हो ।

प्रहरीले उनीहरुबाट पाँच हजार ८०० भारु बरामद गरेको छ । तीनैजना आवश्यक अनुसन्धानका लागि जिल्ला प्रहरी कार्यालयमा रहेको जनाइएको छ ।