६ महिनापछि काठमाडौंका विद्युत पोल हटाइने

काठमाडौं । नेपाल विद्युत् प्राधिकरणले करिब ६ महिनापछि काठमाडौंमा विद्युतको पोल हटाउन सुरु गर्ने जनाएको छ ।

काठमाडौंमा भूमिगत वितरणलाइन बिछ्याइरहेको प्राधिकरणले ओभरहेड वितरणलाइन हटाउने गरी काम गर्ने भएको हो । प्राधिकरणका कार्यकारी निर्देशक कुलमान घिसिङले पोल हटाएपछि त्यहाँ रहेको इन्टरनेटको तार पनि हटाउनुपर्ने बताए ।

घिसिङले इन्टरनेट सेवा प्रदायक, नेपाल दूरसञ्चार प्राधिकरणसहित विद्युत् प्राधिकरणको सहभागितामा भएको कार्यक्रममा भूमिगत विद्युत् वितरणलाइनसँगै राखिएको फाइबर डक्ट प्रयोग गर्ने तयारी थाल्न सेवा प्रदायकलाई आग्रह गरे ।

घिसिङले भने, ‘६ महिनादेखि १ वर्षभित्र हामी विद्युतका पोल हटाउँदैछौं, त्यसपछि गम्भीर समस्या आउनसक्छ, तपाईंहरु प्राधिकरणले भूमिगत लाइनसँगै बिछ्याइएको फाइबर प्रयोग गरेर सेवा दिन सक्नुहन्छ ।’ उनले सबै मिलेर समस्याको समाधान गर्नुपर्ने भन्दै सेवा प्रदायकसँग बसेर भाडा विषयमा उत्पन्न विवाद सुल्झाउन प्राधिरकण तयार रहेको बताए ।