हस्तकलाको निर्यात ८० प्रतिशतले बढ्यो

काठमाडौं । कोभिड महामारीका कारण सङ्कटमा परेको हस्तकला व्यवसाय बिस्तारै लयमा फर्कन थालेको छ। हस्तकला व्यवसायीहरूका अनुसार काठमाडौँ उपत्यकाभित्रका विभिन्न हस्तकला हवहरुमा पहिलेकै रौनक देख्न थालिएको छ। हस्तकलाजन्य वस्तुको उत्पादनसँगै निर्यातमा पनि वृद्धि भएको छ।

व्यापार तथा निकासी प्रवर्द्धन केन्द्र (टीईपीसी) को तथ्यांकअनुसार चालू आर्थिक वर्षको ११ महिनामा हस्तकलाजन्य वस्तुको निकासी ८० प्रतिशतले बढेको छ। नेपाल हस्तकला महासंघका अध्यक्ष प्रचण्ड शाक्य कोभिडका कारण लामो समयदेखि सुस्ताएको हस्तकला क्षेत्र सुधारको बाटोमा अघि बढेको बताउँछन् । ‘हस्तकला क्षेत्र पहिलेकै अवस्थामा फर्किन केही समय लागे पनि हामी आशावादी छौँ । हामी पहिलेभन्दा राम्रो अवस्थामा फर्कदैछौं,’ अध्यक्ष शाक्य भन्छन् । उनका अनुसार बैंकमा तरलता अभावका कारण सिर्जना भएको कर्जा ठप्प तथा बजारमा अत्यधिक महँगीजस्ता समस्यासँग जुधेर हस्तकला व्यवसायीले उत्पादन वृद्धि गर्नु आफैमा सकारात्मक पक्ष हो । आजको कारोबार दैनिकमा समाचार छ ।