आजदेखि राप्ती हाइड्रो एण्ड जनरल कन्स्ट्रक्सनको आईपीओ खुल्यो

काठमाडौं । आज असार २९ गतेदेखि राप्ती हाइड्रो एण्ड जनरल कन्स्ट्रक्सन लिमिटेडले आईपीओ बिक्री गर्ने भएको छ ।

कम्पनीले आईपीओ निष्कासनको लागि धितोपत्र निष्कासन तथा बिक्री प्रबन्धकमा सिद्धार्थ क्यापिटल लिमिटेडलाई नियुक्त गरेको छ । सहायक निष्कासन तथा बिक्री प्रबन्धक मुक्तिनाथ क्यापिटल लिमिटेड रहेको छ ।

उक्त कम्पनीले सर्वसाधारणका लागि प्रतिकित्ता १०० रूपैयाँ अंकित मूल्यमा आईपीओ निष्कासन गर्ने जनाएको छ । कम्पनीले आयोजना प्रभावित क्षेत्रका बासिन्दाहरूका लागि निष्कासन गरेको बिक्री नभएको ३७ हजार ६२३ कित्तासहित २३ लाख ६६ हजार २४० कित्ता साधारण सेयर निष्कासन गर्न लागेको छ । जसबाट ७० हजार ९८८ कित्ता कर्मचारीका लागि र १ लाख १८ हजार ३१२ कित्ता सामूहिक लगानी कोषको लागि सुरक्षित गरेको छ ।

त्यस्तै, सर्वसाधारणले भने बाँकी २१ लाख ७६ हजार ९४० कित्ताका लागि आवेदन दिन पाउनेछन् । लगानीकर्ताले न्युनतम १० कित्ता देखि अधिकतम २१ लाख कित्ता सेयरका लागि आवेदन दिन पाउनेछन् । आईपीओमा साउन १ गतेसम्म आवश्यक आवेदन नपरे साउन ११ गतेसम्म म्याद लम्बिनेछ ।

लगानीकर्ताले नेपाल धितोपत्र बोर्डबाट आस्वा सेवामा अनुमति प्राप्त बैंक तथा वित्तीय संस्थाहरु मेरो सेयरको वेब तथा एपमार्फत पनि आवेदन दिन पाउनेछन् ।

यसैगरी, इक्रा नेपाले कम्पनीलाई ‘इक्राएनपी आईआर बी’ रेटिङ प्रदान गरेको छ । जसले दायित्व बहन गर्ने क्षमतामा उच्च जोखिम रहेको संकेत गर्दछ । कम्पनीले पूर्वी रूकुमको सिस्ने र भुमे गाउँपालिकमा पर्ने रूकुमगाड खोलाको पानिबाट ५ मेगावाट क्षमताको रूकुमगाड जलविद्युत आयोजना निर्माण गरिरहेको छ ।