सेयर बजारमा उछाल, २ अर्ब ४१ करोडमाथि कारोबार

काठमाडौं । आज बिहीबार पनि सेयर बजार सकारात्मक देखिएको छ ।

आज बिहीबार शेयर कारोबार मापक नेप्से परिसूचक १४.७१ अंकले बढेर २००१.५३ विन्दुमा पुगेको छ । नेप्से ०.७४ प्रतिशतले बढेको हो । यता सेन्सेटिभ परिसूचक पनि १.७७ अंकले बढेर ३८३.१३ विन्दुमा रोकिएको छ ।

कूल २२० कम्पनीको ६२ लाख १० हजार ९ सय ८ कित्ता सेयर खरिदबिक्री भई २ अर्ब ४१ करोड १८ लाख ३४ हजार ५ सय ९९ रूपैयाँ बराबरको कारोबार भएको छ । साथै, यस दिन कूल १३ उपसमूहकै सेयर बढेको छ । जहाँ सर्वाधिक हाइड्रोपावर समूहको बढेको छ ।

बिहीबार एनआईसी एशिया बैंक लिमिटेडको ३० करोड १८ लाख ८६ हजार रूपैयाँले सर्वाधिक कारोबार भएको छ । आज एनआईबिएल प्रगति फण्डको मूल्य सबैभन्दा धेरै बढेको छ । फण्डको शेयरमूल्य ९.९८ प्रतिशतले बढेर १० रूपैयाँ १४ पैसा पुगेको छ ।

यस दिन प्रुडेन्सियल इन्स्योरेन्स कम्पनी लिमिटेडको सेयरमूल्य सबैभन्दा धेरै घटेको छ । कम्पनीको सेयरमूल्य ५.०१ प्रतिशतले घटेर ३ सय ४१ रूपैयाँमा झरेको छ ।

लगानीकर्ताहरूले बारम्बार गभर्नरको नियतमा खोट रहेको बताउँदै आइरहँदा हाल सभामा पनि नेपाली कांग्रेस तथा नेकपा (माओवादी केन्द्र) पार्टीहरुले गभर्नरको बर्खास्तको माग गर्दै आएको छ । यसैबीचमा उनको राजिनामाको कुरा चल्दा बजार बढेको केही लगानीकर्ताको अनुमान छ । नेकपा एमालेको अन्तर पार्टी निर्देशनमा अर्थ विभागमा एम अधिकारी, खोटाङ पनि समावेश रहेको र एम अधिकारी भन्नाले गभर्नर महाप्रसाद अधिकारी नै रहेको भन्दै उनको बर्खास्त माग गरिएको हो । जहाँ एमालेले भने विज्ञप्ती जारी गरीवरी एम अधिकारी गभर्नर होइनन् भन्दै स्पष्टिकरण दिएको छ ।