राष्ट्रिय आवश्यकतालाई परिपूर्ति गर्ने गरी विकास निर्माणको खाँचो छ- प्रधानमन्त्री देउवा

काठमाडौं । आज नेपाल इन्जिनियर्स एशोसिएशनले राजधानीमा आयोजना गरेको ६०औँ इन्जिनियर दिवस समारोहमा प्रधानमन्त्री शेरबहादुर देउवाले राष्ट्रिय आवश्यकतालाई परिपूर्ति गर्ने गरी विकास निर्माणको खाँचो रहेको बताए ।

प्रधानमन्त्री देउवाले देशलाई समृद्ध बनाउन सडक, पुल, पुलेसा, नहर जलविद्युत् आयोजना तथा सूचना र प्रविधिको विकासको आवश्यकता रहेको पनि बताए । उनले लागत किफायती, गुणस्तरीय र वातावरणमैत्री पूर्वाधार निर्माण गर्नु नै नयाँ नेपालको आधारशिला भएकाले त्यसतर्फ ध्यान दिनुपर्नेमा जोड दिए । मुलुकको वर्तमान आवश्यकतालाई मध्यनजर गरी इन्जिनियरहरुले दिगो, वातावरणमैत्री र जनताको जीवनयापनमा गुणस्तर वृद्धि हुने गरी कार्य गर्न आवश्यक रहेको पनि उनले बताए ।

आवश्यक पूर्वाधार निर्माण गरी देशलाई समृद्ध बनाउन इन्जिनियनरहरु थप क्रियाशील हुनुपर्ने प्रधानमन्त्री देउवाको भनाइ छ । उनले राष्ट्रिय विकास र आर्थिक समृद्धिको बाटो कोर्न, जनताको आवश्यकता, चाहना र विश्वको अनुभव तथा रोजाइको परिकल्पना अनुसारको विकास निर्माणमा अग्रणी भूमिका निर्वाह गर्दै आएका इन्जिनियरहरुको आधुनिक राष्ट्र निर्माणमा योगदान रहेको पनि उल्लेख गरे ।

उनले इन्जिनियरलाई थप क्षमतावान बनाउन सम्बन्धित मन्त्रालयसँग छलफल गरेर आवश्यक सहयोग गर्न सरकार तयार रहेको बताए । उनले इन्जिनियरहरुले मुलुकको विकास निर्माणमा पुर्‍याएको योगदानको पनि प्रशंसा गर्दै विकास निर्माणका अभियन्ता र परिवर्तनका संवाहक इन्जिनियर भएको बताए ।

भौतिक पूर्वाधार तथा यातायात मन्त्री मोहम्मद इश्तियाक राईले आर्थिक विकासको मेरुदण्डको रुपमा रहेको पूर्वाधार निर्माणमा विशेष ध्यान दिइनुपर्ने बताए । एशोसिएशनका अध्यक्ष डा. हरिबहादुर दर्लामीले जनताको आवश्यकतालाई सम्बोधन गर्न यस पेशामा कार्यरतहरुको समस्यालाई पनि राज्यले सम्बोधन गर्नुपर्नेमा जोड दिए ।