भारतमा उत्खनन रोक्न गएका डीएसपीको टिपरले किचेर हत्या

काठमाडौं । भारतको हरियाणास्थित पचगांवमा अवैद्य उत्खनन रोक्न गएका डीएसपीको हत्या भएको छ ।

बीबीसी हिन्दीले सुरेन्द्र सिंह बिश्नोईको टिपरले किचेर हत्या भएको जनाएको छ । प्रहरीले यस मामिलामा एकजनालाई पक्राउ पनि गरेको छ । प्राप्त भएको पचगांव नजिकको अरावली पहाडमा अवैध उत्खनन भइरहेको सूचनाको आधारमा सिंह मंगलबार दिउँसो १२ बजे एक ड्राइभर र प्रहरीलाई लिएर छापा मार्न पुगेका थिए ।

उनले त्यहाँ पुगेर एउटा सन्दिग्ध टिपरलाई रोकेर आवश्यक कागजपत्र माग गरेका थिए । तर टिपरका चालकले गाडी उनीमाथि चढाएपछि घटनास्थलमै मृत्यु भएको जनाइएको छ ।

हरियाणा प्रहरीले ट्वीट गर्दै भनेको छ, ‘आफ्नो जिम्मेवारी निर्वाह गर्दैगर्दा डीएसपी सुरेन्द्र सिंहले आफ्नो गुमाएका छन् । हरियाणा प्रहरीको समवेदना पीडित परिवारको साथमा छ । दोषीलाई कारबाही गर्न कुनै कसर बाँकी राखिनेछैन ।’

मुख्यमन्त्री लाल खट्टरले सिंहलाई शहीदको दर्जा दिइने र परिवारलाई १ करोड भारुको आर्थिक सहायता तथा एक सदस्यलाई सरकारी जागिर दिने घोषणा गरेका छन् । सिंह १९९४ मा एएसआईमा भर्ती भएका थिए । उनी तावडूमा डीएसपी पदमा तैनाथ थिए । उनी चार महिनापछि रिटायर हुन लागेका थिए ।