रणवीर र आलिया विवाहको ३ महिनापछि हनिमुन जाँदै

एजेन्सी । बलिउड अभिनेता रणवीर कपुर ‘शमशेरा’ रिलिजपछि अभिनेत्री एवम् श्रीमती आलिया भट्टसँग एक साता हनिमुनमा जाने भएका छन् ।

उनी विवाहपछि फिल्ममा कामको प्रतिबद्धताका कारण हाल सम्म हनिमुनमा जान सकेका छैनन् । रणवीर ‘शमशेरा’बाट ४ वर्षको लामो ब्रेकपछि ठूलो पर्दामा फर्किएका छन् । कुराकानीका क्रममा उनले फिल्म रिलिजपछि पुनः ब्रेक लिने बताए । उनी अब छिट्टै लव रञ्जनको अनटाइटल्ड रोमान्टिक कमेडी फिल्ममा देखिनेछन् । जहाँ श्रद्धा कपूर पनि मुख्य भूमिकामा देखिनेछिन् ।

त्यस्तै, एक अन्तर्वार्तामा हनिमुनमा किन नगएको भन्ने प्रश्नको जवाफमा उनले भनेका थिए, ‘जब आलिया र मैले अचानक विवाह गर्ने निर्णय गर्यौं, तब हामी दुवैलाई थाहा थियो कि हामीसँग केही कामको प्रतिबद्धता छ । यस्तो अवस्थामा हामीले समय दिन सकेनौं । ‘फिल्म ‘शमशेरा’ रिलिज भएपछि आलिया र म छुट्टी मनाउने योजनामा छौं ।’

विवाहको लगत्तै आलिया हलिउड फिल्म ‘हार्ट अफ स्टोन’को सुटिङका लागि लण्डन र रणवीर लव रञ्जनको फिल्मको सुटिङका लागि स्पेन गएका थिए । यी दुईले यही वर्ष १४ अप्रिलमा परिवार र केही विशेष साथीहरूको उपस्थितिमा विवाह गरेका थिए । यसअघि, सन् २०१७ मा फिल्म ‘ब्रह्मास्त्र’को सेटको पहिलो भेटपछि उनीहरु ५ वर्षसम्म प्रेमसम्बन्धमा थिए ।

आलियाले केही दिनअघि मात्र सामाजिक सञ्जालमा अस्पतालको तस्बिर शेयर गर्दै दुवै छिट्टै आमाबुवा बन्न लागेको बताएकी छन् ।