काठमाडौं। दीपकराज गिरी, दीपाश्री निरौला र निर्मल शर्माको समुहले छक्का पञ्जा सिरिजलाई नै अगाडि बढाउने भएको छ । उक्त समुहले छक्का पञ्जा अन्तर्गतको चौथो सिरिजको घोषणा गरेको हो ।

सूर्यविनायकमा सोमबार पूजाआजा गर्दै निर्माण टिमले फिल्मको नाम र कलाकारको नाम औपचारिक रुपमा घोषणा गरेको हो । फिल्ममा निर्देशक र केही कलाकार परिवर्तन भएका छन् । छक्का पञ्जा ४’ लाई हेमराज बिसीले निर्देशन गर्दैछन् । यसअघिका तीनै शृंखला दीपाश्री निरौलाले निर्देशन गरेकी थिइन् । योबाहेक फिल्मबाट निर्माताको टिम पनि अलग्गिएको छ ।

यसअघि फिल्ममा साझेदार रहँदै आएका सुमन गिरी र निशान बजगाईं यो फिल्मको निर्माण समूहबाट अलग भएका छन् । उनीहरूले जितु नेपालसँग मिलेर फिल्म निर्माण गर्ने तयारी गरिरहेका छन् ।

यसैगरी यो फिल्मबाट राज आचार्यले हिरोमा डेब्यू गर्दैछन् । फिल्मको यो शृङ्खलामा यस पटक मलिना जोशी र बेनिशा हमाल थपिएका छन् । यसअगाडि दीपकले अर्कै शिर्षकमा फिल्म बनाउने सोच बनाएका थिए ।

यद्यपि ‘कबड्डी’ को चौथो शृङ्खलाले गरेको व्यापारपछि उनको समुहले यसै नाममा फिल्म बनाउने निधो गरेको हो । कबड्डीको चौथो शृङ्खलाले नेपालमा मात्र नभई विदेशमा पनि उत्तिकै व्यापार गरेको थियो ।

यो फिल्मलाई दसैँ वा तिहारमा प्रदर्शनमा ल्याउने गरि फिल्मको छायांकन आजैबाट सुरु गरिएको छ । घोषणा गरिएको सो चलचित्र २०१६ मा बनेको ब्लकबस्टर हास्य चलचित्र ‘छक्का पञ्जा’ को चौथो संस्करण हो ।

त्यस्तै तेस्रो संस्करणसम्म चलचित्रमा हास्य पात्रका रूपमा देखिएका हास्य कलाकार जितु नेपाल ‘छक्का पञ्जा ४’ मा नदेखिने पक्का भएको छ । चलचित्रमा आफू नभएता पनि टिमलाई शुभकामना दिन सोमबार उनी फूल लिएर भक्तपुर पुगेका थिए । दीपाश्री निरौला र जितु नेपालबिच भएको आपसी मनमुटाबका कारण सायद जितु यो भागमा नभएको हुन सक्ने धेरैको अनुमान छ ।