काठमाडौं । चलचित्र विकास बोर्डकाको अध्यक्षमा भुवन केसी नियुक्त भएका छन् । उनले बुधबार पदभार ग्रहणपछि आयोजित स्वागत कार्यक्रममा बोल्दै आफू फिल्म क्षेत्रको विकासका लागि शहीद हुन समेत तयार रहेको बताएका छन् ।
आक्रामक लबजमा सुनिएका उनी धेरै पहिलेदेखि विदेशी फिल्मको नियन्त्रणको विषयमा गम्भीर देखिन्छन् । धेरै पटक उनले विदेशी फिल्मलाई कोटा लगाउनेदेखि नियन्त्रण गर्नेसम्मको अभिव्यक्ति दिंदै आएका छन् ।
कार्यक्रममा उनले भने, ‘मेरो तन, मन, धन र मेरो सपना नै चलचित्र क्षेत्र र चलचित्रकर्मीको उत्थान र विकासको लागि हो । यदि म एक जना भिक्टिम भएर, म एक जना शहीद भएर मेरो चलचित्र क्षेत्र मेरो कलाकारिता क्षेत्र मेरो कलाकार प्राविधिक साथी, मेरो देश भाषा र संस्कृति क्षेत्रको राम्रो हुन्छ भनेदेखि बरु म शहीद हुन तयार छु । त्यसकारण म जहाँ पनि जान तयार छु चलचित्र क्षेत्रको लागि ।’
राजनीति नियुक्तिको आधारमा उनी अध्यक्ष पदमा पुगेको भन्ने सञ्चारकर्मीको प्रश्नमा उनले सो जवाफ दिए हुन् । उनले चाँडै गोलमेच सम्मेलन गर्ने र चलचित्रकर्मीको सुझाव संकलन गर्ने योजना रहेको पनि बताए ।
