नेपालले ५ वर्षका लागि भारतबाट रासायनिक मल खरिद गर्ने

काठमाडौं । नेपाल सरकारले भारतसँग ५ वर्षका लागि करिब नौ लाख मेट्रिक टन रासायनिक मल खरिद गर्ने सम्झौता गरेको छ ।

सम्झौता अनुसार नेपाल सरकारले सन् २०२५/२६ भित्र ४ लाख ५७ हजार मेट्रिक टन युरिया र ३ लाख ७० हजार मेट्रिक टन डिएपी खरिद गर्नेछ । गत चैतमा मल खरिदका लागि भएको सरकार-सरकार (जीटूजीं) सम्झौता बमोजिम नेपालको कृषि सामग्री कम्पनी लिमिटेड र भारतको राष्ट्रिय केमिकल फर्टिलाइजर (आरसीएफ) बीच खरिद समयको अन्तर्राष्ट्रिय मूल्यअनुसार मल खरिद गर्ने सम्झौता भएको हो ।

कृषि सामग्री कम्पनीका निमित्त प्रबन्ध सञ्चालक राजेन्द्र कार्कीले आर्थिक वर्ष ०८३/८४ सम्मका लागि मल खरिद गर्न उक्त सम्झौता साउन १ गते भएको जानएका छन् । कार्कीले पहिलो लट १ लाख ६० हजार मेट्रिक टन मल आगामी मंसिरसम्म नेपाल भित्रीसक्ने बताए । उनले थप भने, ‘सम्झौता ढिलो भएका कारण दोस्रो वर्षअनुसार १ लाख १० हजार मेट्रिकटन युरिया र ६० हजार मेट्रिकटन डिएपी मल ल्याइने छ ।’

सम्झौताअनुसार दोस्रो वर्ष (यो आर्थिक वर्ष) ६० हजार डिएपी, १ लाख १० हजार युरिया, तेस्रो वर्ष १ लाख १५ हजार युरिया र ८० हजार डिएपी मल ल्याइनेछ । चौथो वर्ष १ लाख २० हजार युरिया र ९० हजार मेट्रिकटन डिएपी ल्याइनेछ भने पाँचौ वर्ष १ लाख २० हजार मेट्रिकटन युरिया, ९० हजार डिएपी मल ल्याइने जनाइएको छ ।

नेपालको आग्रहपछि भारतीय कम्पनीले ग्लोबल टेण्डर गरी मल खरिद गर्ने र त्यसपछि नेपाललाई बिक्री गर्ने गरी २ कम्पनी बीच सम्झौता भएको छ । सम्झौतामा भारतीय कम्पनीले नेपाली कम्पनीकै नाममा बोरामा प्याकिङसहित मल नाकामा बुझाउने उल्लेख छ ।

यसैगरी, कार्कीले मलको ढुवानी गोदाम बिराटनगर, भैरहवा र वीरगन्ज नाका तोकिएको बताए ।