गाउँमा घट्टे खोला पसेपछि २५ घर विस्थापित

काठमाडौं । अविरल वर्षाले घट्टे खोलामा बाढी आएपछि रुकुम पश्चिमका २५ घर विस्थापित भएका छन् ।

कर्णाली प्रदेश प्रहरीले १० गतेदेखि लगातार वर्षा परेपछि आठबीसकोट नगरपालिका वडा नम्बर ७ गाराको घट्टे खोला गाउँमा पसेको जनाएको छ । स्थानीय जनप्रतिनिधि र प्रहरीको सहयोगमा खोलाको उच्च जोखिममा परेका ती परिवारलाई आफन्तको घरमा राखिएको छ ।

आठबीसकोट नगरपालिकाका मेयर रवी केसीले सडक खन्ने क्रममा निस्किएको माटो र ढुङ्गा बगेर खोलामा मिसिदा घट्टे खोलामा लेदोसहितको बाढी आई गाउँमा पसेको जनाए । बाढीले गाउँको धान, मकै र अन्य खेतीबाली सबै नस्ट गरेको छ ।

प्रदेश प्रहरीले ईलाका प्रहरी कार्यालय आठबीसकोट खटिएको प्रहरी र स्थानिय तहको सम्वन्वयमा जेसीबी लगाएर खोलालाई साबिक ठाउँमा ल्याउने प्रयास भइरहेको जानकारी दिएको छ ।