काठमाडौं । नेपाल सरकारले स्टेट पार्टनरसीप प्रोग्राम (एसपीपी)लाई अघि नबढाउने पत्र अमेरिकालाई पठाएको छ ।

परराष्ट्रमन्त्री नारायण खड्काले ९ साउनमा अमेरिकालाई लिखित जानकारी गराएको संसदलाई जानकारी दिएका छन् । ६ असार २०७९ मा बसेको मन्त्रिपरिषद् बैठकले एसपीपी अघि नबढाउने निर्णय गरेको थियो । यद्यपि, सरकारले अमेरिकालाई औपचारिक पत्र नपठाएको विषयमा चारैतिर आलोचना भएको थियो ।

परराष्ट्रमन्त्री खड्काले शुक्रबार संसदमा भने, ‘कूटनीतिक माध्यमबाट नेपालले एसपीपीलाई अघि नबढाउने निर्णय गरेको लिखित जानकारी अमेरिकी सरकारसमक्ष पठाएको सम्मानित सदनमा जानकारी गराउन चाहन्छु । आन्तरिक परामर्श आवश्यक भएकाले केही समय लागेको हो ।’

मन्त्री खड्काले पत्राचार गर्न ढिला गरेको विषयमा नेपाल सरकारको दृष्टिकोण स्पष्ट रहेको दाबी गरे । साथै, उनले स्वतन्त्र, सन्तुलित परराष्ट्र नीति सञ्चालनका लागि सरकारसक्षम रहेको पनि बताए ।