वाईसीएलको राष्ट्रिय भेलामा नयाँ नेतृत्व चयन हुने, कहिले छ भेला?

काठमाडौं । नेकपा माओवादी केन्द्रको युवा संगठन वाईसीएलले नयाँ नेतृत्व चयनका लागि दोस्रो राष्ट्रिय भेला गर्ने जनाएको छ ।

वाईसीएलका सहसंयोजक सुबोध शेर्पाइलीले भदौ ३ र ४ गते काठमाडौंमा राष्ट्रिय भेला हुने जानकारी दिए । उक्त भेलाबाट पदाधिकारी र नयाँ केन्द्रीय समिति चयन हुने जनाइएको छ । करिब ५ सय प्रतिनिधि सहभागी हुने उक्त भेलामा एक महिलासहित प्रत्येक जिल्लाबाट ३ जना, हालका केन्द्रीय सदस्य २०४ जना, दुई केन्द्रीय विभागबाट ४२ प्रतिनिधि राष्ट्रिय सम्मेलनमा सहभागी हुनेछन् । जहाँ कुल प्रतिनिधिको ५ प्रतिशत केन्द्रीय कार्यालयले प्रतिनिधि मनोनित गर्नेछ ।

गत भदौ १२ र १३ गते भएको पहिलो राष्ट्रिय भेलाबाट सर्वसम्मत रुपमा पदाधिकारी चयन नभएपछि सुमन देवकोटाको संयोजकत्वमा राष्ट्रिय भेला आयोजक समिति बनाइएको थियो । अध्यक्षमा देवकोटा र शेर्पालीबीच सहमति जुट्न नसकेपछि २०४ सदस्यीय केन्द्रीय समिति घोषणा गरिएको थियो । जहाँ समितिलाई मंसिर ८ वा फागुन १ मा राष्ट्रिय भेला गर्न ‘म्यान्डेट’ थियो ।

यसअघिका अध्यक्ष रामप्रसाद सापकोटा दिपशिखाले ४० वर्षे उमेर हद पार गरेका कारण संगठनबाट हटेकी थिइन् ।