काठमाडौं । एनएमबि बैंकको नाफामा खुद ब्याज आम्दानीसँगै सम्भावित कर्जा नोक्सानीवापतको प्रोभिजन रकमबाट भएको राइट ब्याकले गर्दा उच्च वृद्धि भएको छ ।

बैंकले बिहीबार आ।व २०७८/०७९ मा ३ अर्ब ७० करोड १३ लाख रुपैयाँ मुनाफा कमाएको अपरिस्कृत वित्तीय विवरण सार्वजनिक गरेको छ । आ.व २०७७/०७८ मा २ अर्ब ७१ करोड ११ लाख रुपैयाँ खुद मुनाफा कमाएको बैंकले गत आ.व.मा ३६.५३ प्रतिशतले नाफा वृद्धि गरेको हो । गत आ.व.मा खुद ब्याज आम्दानी १५.७५ प्रतिशतले बढेर ६ अर्ब ५५ करोड २२ लाख पुगेको बैंकले सम्भावित कर्जा जोखिम वापतको प्रोभिजनबाट ४८ करोड ४३ लाख राइटब्याक गरेको छ ।

बैंकले कर्जा लगानी १६.४१ प्रतिशतले विस्तार गरी १ खर्ब ७५ अर्ब ७८ करोड ८१ लाख पुर्‍याएको छ । त्यस्तै, निक्षेप १२.३७ प्रतिशतले बढाएर १ खर्ब ८४ अर्ब ८२ करोड ८९० लाख रुपैयाँ पुगेको छ । कर्जा बढेसँगै बैंकको कर्जा र निक्षेपबीचको ब्याजदर अन्तर अर्थात स्प्रेड दर पनि बढेको देखिएको छ । जसकारण, बैंकको खुद ब्याज आम्दानी पनि बढेको छ ।

बैंकको खुद सञ्चलान आम्दानी पनि ३०.६४ प्रतिशतले बढेर ९ अर्ब १८ करोड ९३ लाख पुगेको छ । यससँगै, सञ्चालन मुनाफा पनि बढेको छ । बैंकको कर्मचारी खर्च २४.४५ प्रतिशतले बढेर २ अर्ब ६० करोडमाथि पुगेको छ । खुद सञ्चालन आम्दानीमा भएको सुधारले कर्मचारी खर्च बढे पनि बैंकको सञ्चालन मुनाफा ३६.४३ प्रतिशतले बढेर ५ अर्ब २१ करोड २९ लाख रुपैयाँ पुगेको छ ।

यस्तै, बैंकले गत आ.व.मा १२.५ प्रतिशत बोनस सेयर मार्फत चुक्ता पूँजी १६ अर्ब ३१ करोड ५९ लाखबाट १८ अर्ब ३६ करोड ६७ लाख पुयाएको छ । बैंकको सञ्चित कोषमा २ अर्ब ३९ करोड २४ लाख र जगेडा कोषमा ६ अर्ब ४४ करोड ८६ लाख छ । साथै, प्रतिसेयर आम्दानी १४ रुपैयाँ ७६ पैसाबाट बढेर २० रुपैयाँ १४ पैसा रहेको छ । प्रतिसेयर नेटवर्थ पनि १४६.६६ रुपैयाँबाट बढेर १४८.१४ रुपैयाँ रहेको छ ।

बैंकको कोषको लागत बढेसँगै बेसरेट ६.९९ प्रतिशतबाट ९.३८ प्रतिशत पुगेको छ । निष्कृय कर्जा २.२७ प्रतिशतबाट १.३३ प्रतिशतमा झरेको छ र बैंकको कर्जा–निक्षेप अनुपात ८५.५५ प्रतिशत रहेको छ ।