काठमाडौँ । चाडपर्वको अगाडि बजारमा चिनीको हाहाकार भएको छ । दशैैं, तिहार तथा छठ पर्व घरदैलोमा आइपुग्दा पनि सरकारले चिनीको व्यवस्था गर्न नसक्दा उपभोक्ता मर्कामा परेका छन् ।
चाडबाडमा खासगरी दैनिक उपभोग्य वस्तुका सामग्रीको बढी उपभोग हुने बेलामा सरकारले आवश्यक सामग्रीहरुको आपूर्ति व्यवस्थापन बिगतका दिनहरुमा जस्तै यस वर्ष गर्ने जमर्को गरेको भए पनि उपभोक्ताले चिनी नपाउने राष्ट्रिय उपभोक्ता मञ्चले जनाएको छ ।
सरकारले दसैं, तिहार तथा छठ लक्षित सुपथ मूल्यका पसल सञ्चालन गरी बजार मूल्य हस्तक्षेप गरी आम उपभोक्तालाई राहत प्रदान गर्ने प्रयास गरेको छ । तर सरकारले प्रयास गर्दैगर्दाको अवस्थामा मन्त्रालयहरुबीचमा समन्वय नहुँदा उपभोक्ताले चिनी भने नपाउने देखिएको हो ।
आपूर्ति मन्त्रालयले चाडबाडलाई लक्षित गरी सहुलियत दरमा चिनी उपलब्ध गराउनको लागि साल्ट ट्रेडिङ कर्पोरेशन र नेपाल खाद्य व्यापार कम्पनीलाई क्रमशः ३० र १० हजार मेट्रिक टन चिनी आपूर्ति गर्नको लागि छुट मूल्यमा आयात गर्न सिफारिस गरेकोमा अर्थ मन्त्रालयले बेवास्ता गर्दा अहिले बजारमा प्रतिकिलो ११० रुपैयाँमा किन्न उपभोक्ता बाध्य भएका छन् ।
मञ्चले गरेको अध्ययनका क्रममा भारतले निर्यातमा प्रतिबन्ध लगाइसकेको चिनी आपूर्ति नेपालमा पर्याप्त आपूर्ति भइरहनुको कारण नेपालको दक्षिणी सिमावर्ती क्षेत्रबाट तस्करी भई आउने चिनीको परिमाण दैनिक ३०० मेट्रिक टनको हाराहारीमा रहेको पाइएको तथा त्यही चिनी नै अहिले बजारमा पर्याप्त मात्रामा उपलब्ध भइरहेको छ ।
अवैध रुपमा चिनी आयात गर्दा ४० प्रतिशत भन्सार महसुल तथा १३ प्रतिशत मूल्य अभिवृद्धि कर लाग्दै आएकोमा यसरी अवैध बाटोबाट आयात गर्दा सरकारलाई ठूलो परिमाणमा राजस्व गुमिरहेको छ । अर्कोतिर पहाड तथा सहरी क्षेत्रका जनताले महँगो मूल्यमा चिनी उपभोग गर्न बाध्य भइरहेका कारण सरकारको ध्यानाकर्षण गर्दै मञ्चले उपभोक्तालाई सहुलियत दरमा चिनी उपलब्ध गराउने वातावरण बनाइदिन प्रधानमन्त्रीलाई गुहारेको छ ।
