नेप्से परिसूचकसँगै बढ्यो

काठमाडौँ । आज (बुधबार) पनि सेयर बजारले उकालो यात्रा तय गरेको छ । नेप्से परिसूचकसँगै कारोबार रकम पनि बढेको छ । नेपाल स्टक एक्सचेञ्जका अनुसार बुधबार सेयर कारोबार मापक नेप्से परिसूचक ७.३२ अंकले बढेर १९३८.३० विन्दुमा पुगेको छ । नेप्से ०.३८ प्रतिशतले बढेको हो । यता सेन्सेटिभ परिसूचक पनि ०.७९ अंकले बढेर ३८२.९४ विन्दुमा पुगेको छ ।

कूल २२७ वटा कम्पनीको ४३ लाख ४६ हजार ७ सय ८ कित्ता सेयर खरिदबिक्री हुँदा १ अर्ब ४६ करोड ७९ लाख १४ हजार ८ सय ७५ रूपैयाँ बराबरको कारोबार भएको नेप्सेले जनाएको छ ।

कारोबार भएको १३ उपसमूहमध्ये ३ वटा उपसमूह घटेको छ भने बाँकी सबै उपसमूह उकालो लागेका छन्। सबैभन्दा धेरै विकास बैंक समूह बढेको छ । आज शिवम् सिमेन्ट कम्पनी लिमिटेडको सर्वाधिक कारोबार भएको छ । कम्पनीको ७ करोड ८५ लाख ६० हजार रूपैयाँ बराबरको कारोबार भएको हो ।

यस्तै, बुधबार कर्पोरेट डेभलपमेन्ट बैंक लिमिटेडको सेयरमूल्य सबैभन्दा धेरै बढेको छ । बैंकको सेयरमूल्य ८.७४ प्रतिशतले बढेर प्रतिकित्ता २ सय ८८ रूपैयाँ ५० पैसा पुगेको छ । त्यसैगरी, यस दिन सबैको लघुवित्त वित्तीय संस्था लिमिटेडको सेयरमूल्य सबैभन्दा धेरै घटेको छ । संस्थाको सेयरमूल्य ३.९६ प्रतिशतले घटेर ९ सय ९४ रूपैयाँमा झरेको छ ।