आज साँझसम्म तीन निर्वाचन क्षेत्रबाहेकको सबै मतपरिणाम आइसक्छः आयोग प्रवक्ता

काठमाडौं । निर्वाचन आयोगका प्रवक्ता शालिग्राम शर्मा पौडेलले आज साँझसम्म तीन निर्वाचन क्षेत्रबाहेकको सबै परिणाम आउने बताएका छन् ।

‘हामीले मंसिर १२ सम्म सबै निर्वाचन परिणाम प्रकाशित गरिसक्ने भनेकै हौं । समानुपातिकको ९० प्रतिशत मतगणना भइसकेको छ । विवाद रहेका तीन निर्वाचन क्षेत्रबाहेकको परिणाम आज साँझसम्म सबै आइसक्छ,’ नेपाली रेडियो नेटवर्क ९एनआरएन० को कार्यक्रम ‘नेपाली बहस’का लागि पत्रकार ऋषि धमलासँग कुरा गर्दै प्रवक्ता पौडेलले भने । अब प्रतिनधिसभातर्फ उदयपुर १, सुनसरी ३ र ४ को परिणाम आउन बाँकी छ ।

दलहरुबीचको विवादका कारण ती क्षेत्रको मतगणनामा ढिलाइ भएको पनि उनले बताए । पौडेलले भने, ‘दलहरुबीच सानातिना कुरामा विवाद भइरहने, गणना रोकिने गर्दा ढिलो भएको हो । दलहरुबीच सहमति हुनासाथ मतगणना अघि बढ्छ ।’ उनले बाँकी निर्वाचन क्षेत्रको मतपरिणाम मंसिर २० सम्म आएपछि राष्ट्रपति कार्यालयमा प्रतिवेदन बुझाउने विश्वास व्यक्त गरे । प्रवक्ताले भने, ‘हामीले दिएको समयसीमाभन्दा एक साताको फरक पर्ने भयो ।’

बाजुरा र स्याङ्जामा मतगणना कहिले हुन्छ भन्ने पत्रकार धमलाको प्रश्नमा प्रवक्ता पौडेलले भने, ‘हामीले हिजो मात्र दोलखाका केही मतदान केन्द्रमा मंसिर १५ सम्म पुनः मतदान गर्ने भनेका छौं । अब बाजुरा र स्याङ्जा १ को उस्तै अवस्था छ । यसबारे औपचारिक निर्णय भएको छैन । स्याङ्जामा हामीले पठाएको जाँचबुझ र अध्ययन गरी टोली फर्किएको छ । आज प्रतिवेदन देला । बाजुरामा पनि टोली गएको छ । दुवै क्षेत्रमा चाँडै निर्णय हुन्छ ।’

निर्वाचन आयोगले सत्ता, शक्तिको प्रभाव र दबाबमा नपरी तथ्यमा आधारित भएर कानुनसम्मत निर्णय लिने पनि पौडेलको स्पष्टोक्ति छ । उनले थपे,’ हामी कसैको दबाबमा पर्दैनौं । पार्टीको वा सत्ता र शक्तिको प्रभावमा निर्णय गर्ने भए त टोली पठाउने नै थिएन नि । दुवै पक्षका आआफ्ना कुरा छन् । आयोगले तथ्यमा आधारित भएर निर्णय गर्छ । आयोगले निर्णय लिन समय लाग्छ । यो चुट्कीमा भरमा गर्ने कुरा होइन ।’

समानुपातिक मतमा त गडबडी भयो भन्छन् नि भन्ने पत्रकार धमलाको प्रश्नमा पौडेलले भने, ‘आयोगले स्वतन्त्र रुपमा निर्वाचन सम्पन्न गराएको छ । हरेक निर्वाचन अधिकृतले आयोगलाई सहीछाप गरेर मतपरिणाम दिएका हुन्छन् । हामीले त्यही आधारमा आधारमा परिणाम प्रकाशित गर्ने हो । त्यसमा तलमाथि गर्ने कुरा आउँदैन । सबै प्रमाण हामीसँग हुन्छन् ।’

यसपटक २ देखि ३ प्रतिशत मत बदर भएको आयोगको पूर्वानुमान छ । निर्वाचनमा १० अर्बको खर्चसीमामा बसेर आयोगले खर्च गरेको पनि उनले बताए ।