भन्सार प्रमुख झाले घुस लिएर छाडे तीन ट्रक र ९ सय ८० बोरा चिनी १

सर्लाही । सर्लाहीको विभिन्न स्थानबाट विभिन्न समयमा प्रहरीले बरामद् गरेको ठूलो मात्राको चिनीसहित ट्रक जिल्ला भन्सार कार्यालय सर्लाहीले घुस खाएर छाडेको छ ।

जिल्ला प्रहरी कार्यालय सर्लाही र ईलाका प्रहरी कार्यालय हरिवनको टोलीले जिल्लाका विभिन्न स्थानबाट अवैद्य रुपमा ल्याँउदै गरेको अवस्थामा तीन वटा ट्रक र १ हजार ४ सय ६० बोरा चिनी बरामद् गरि जिल्ला भन्सार कार्यालय सर्लाहीलाई बुझाएको थियो ।

ईलाका प्रहरी कार्यालय हरिवनको टोलीले हरिवन नगरपालिका–९ स्थित नयाँ रोडबाट भदौ अन्तिम साता दुई वटा ट्रक र ९ सय ८० बोरा भन्सार छलीको चिनी नियन्त्रणमा लिएको थियो ।

त्यसको करिब १५ दिनपछि जिल्ला प्रहरी कार्यालय सर्लाहीको टोलीले बसबरीया गाउँपालिका–३ बाट पनि ४ सय ८० बोरासहित एउटा ट्रक नियन्त्रणमा लिएर जिल्ला भन्सार कार्यालयमा बुझाएको थियो ।

प्रहरीले बरामद् गरेको चिनी र ट्रक जिल्ला भन्सार कार्यालय बुझाएको भएतापनि जिल्ला भन्सार कार्यालय सर्लाहीका प्रमुख दिपेन्द्र कुमार झाले प्रति ट्रक रु ३ लाखका दरले घुस खाएर तीन वटै ट्रक र ९ सय ८० बोरा चिनी छाडेका छन् ।

ईलाका प्रहरी कार्यालय हरिवनको प्रहरी टोलीले नियन्त्रणमा लिएको ना ७ ख ६१४५ र प्रदेश २–०३–००१ ख ६५८५ नम्बरका २ वटा ट्रकको रु १ करोड ६० लाख र ९ सय ८० बोरा चिनीको अन्दाजी मूल्य रु ६८ लाख ६० हजार गरि रु २ करोड २८ लाख ६० हजार र जिल्ला प्रहरी कार्यालय सर्लाहीको टोलीले नियन्त्रणमा लिएको मधेश प्रदेश ०३–००१ ख ७५८८ नम्बरको ट्रकको रु ३० लाख र ४ सय ८० बोरा चिनीको रु रु १४ लाख ४० हजार अन्दाजी मुल्याङ्कन गरि तीनवटा ट्रकको रु १ करोड ९० लाख र १ हजार ४ सय ६० बोरा चिनीको रु ८३ लाख गरि कुल रु २ करोड ७३ लाख अन्दाजी मुल्यांकन गरि प्रहरीले भन्सार बुझाएको थियो ।

तर जिल्ला भन्सार कार्यालय सर्लाहीका प्रमुख झाले तीन वटै ट्रक र ९ सय ८० बोरा चिनी रु ९ लाख घुस खाएर छाडि दिएका छन् भने मधेश प्रदेश ०३–००१ ख ७५८८ नम्बरको ट्रकमा बरामद् भएको ४ सय ८० बोरा चिनी जिल्ला भन्सार कार्यालय मै राखेका छन् ।

बलरा नाकाबाट नेपाल भित्रिएका तीन वटै ट्रकका मालिकहरुसँग भन्सार कार्यालय प्रमुख झाले रातीको समयमा बाहिर बसेर घुस रकम डिल गरेका हुन् ।

१ हजार ४ सय ६० बोरा मध्ये ९ सय ८० बोरा चिनी र ना ७ ख ६१४५ र प्रदेश २–०३–००१ ख ६५८५ नम्बरका २ वटा ट्रक भन्सार लिलामी नगरि भन्सार प्रमुख झाले घुस खाएर छाडेका भन्सार कार्यालय सर्लाही स्रोतले बताएको छ ।

त्यस्तै ४ सय ८० बोरा चिनी कार्यालय मै किन बाँकी राखियो भन्ने विषय अनुसन्धानको विषय रहेको जिल्ला भन्सार कार्यालय सर्लाहीका एक कर्माचारीले बताए । तर यता कार्यालय प्रमुख झाले नेपाली नम्बर प्लेटका ट्रक भएकाले लिलामी गर्न नमिल्ने र चिनी पनि जसको थियो उसैले सकारेर लगेको बताए ।

भन्सार विभागका सूचना अधिकारी पुण्य विक्रम खड्काले मुद्धा प्रक्रियाका बारेमा आफूहरुले बुझेर के रहेछ रु भन्ने बारे बताउने बताए ।