काठमाडौं । स्वास्थ्य तथा जनसंख्या मन्त्रालयले सप्तरीको कञ्चनरूप नगरपालिकाका पाँच जनाको मृत्यु उपचार नपाएर नभइ अत्यधिक जाँड–रक्सी खाएका कारण उत्पन्न समस्याले गर्दा भएको दाबी गरेको छ ।
उपचार नपाएर कञ्चनरूप गाउँपालिकाका पाँच जना व्यक्तिको ज्यान गएको भनि विभिन्न सञ्चार माध्ययमा खबर प्रकाशन भएपछि मन्त्रालयले स्थलगत निरीक्षण गर्दा उपचार नपाएर ज्यान गएको कुरा सत्य नभइ जाँड–रक्सी खाएको र चेतनाको कमीले भएको पाइएको दाबी गरेको हो ।
मन्त्रालयले निकालेको विज्ञप्तिमा वडा नम्बर ५ का सुरज सदाले अत्यधिक जाँड–रक्सी खाएको कारण विदेशबाट फिर्ता पठाएको र जाँड–रक्सीका कारण कलेजो काम नलाग्ने भएका सदाको उपचारकै क्रममा ज्यान गएको दाबी गरेको छ ।
यस्तै वडा नम्बर ८ का चन्दु सदा र वडा नम्बर ९ का भिखो खङ्गको पनि जाँड–रक्सीकै कारण ज्यान गएको स्वास्थ्य मन्त्रालयको दाबी छ ।
वडा नम्बर ४ का राजदेव सदाको उपचारको क्रममा एक वर्षअघि नै काठमाडौंमा ज्यान गएको र वडा नम्बर ४ की बबिता पासवान जन्मताज सुस्त मनस्थितिकी रहेकी र अवस्था बिग्रिएर उपचारकै क्रममा ज्यान गएको मन्त्रालयको विज्ञप्तीमा उल्लेख छ ।
विज्ञप्तिमा मन्त्रालयले कञ्चनरूप नगरपालिकाले नगरप्रमुख निःशुल्क घरदैलो स्वास्थ्य शिविर लगायतका स्वास्थ्य जाँच तथा अरू स्वास्थ्य उपचार सम्बन्धी कार्यक्रम गरिरहेको दाबी पनि गरेको छ ।
