नारायणगढ- मुग्लिन सडक दैनिक ४ घण्टा ठप्प, एक महिनासम्म यात्रुले भोग्नेछन् सास्ती

चितवन । नारायणगढ-मुग्लिन सडकखण्ड दैनिक रुपमा ४ घण्टा ठप्प हुने भएको छ । सो सडकमा पुल निर्माणका लागि पहाड काट्ने क्रम नसकिएपछि पुनः दैनिक रुपमा सडक आवागमन बन्द गरेर काम जारी राखिने भएको हो ।

कहिले बाटो विस्तारका लागि त कहिले पुल निर्माणका लागि भन्दै यो सडकमा आवागमन ठप्प पार्दा हजारौँ यात्रु र मालवाहक सवारी आवागमनमा सास्ती हुँदै आएको छ ।

पटक पटक पहाड काट्नाले पहिरो गएर समेत बेलाबेला सडक अवरुद्ध हुने गर्छ । उसै पनि सवारीको चापका कारण यस सडकखण्डमा जाम हुने हुनाले यात्रुहरुलाइ सास्ती त छँदै छ । अझ निर्माण कार्यका लागि सडक बन्द गर्दा जाम झन बढ्ने गरेको छ ।

एक महिनाघि पनि सोही पुल निर्माण्का लागि सडक दैनिक रुपमा बन्द गरिएको थियो । सडक आवागमन बन्द गरेर निर्माण गर्दा काम प्रभावकारी भएको भन्दै बाँकी काम पनि छिटो सक्काउन पुनः सडक बन्द गरी निर्माण कार्य गर्न लागिएको सो सडक योजना कार्यालयले जनाएको छ ।

यस पटक भने दैनिक दिउँसो १२ बजेदेखि ४ बजेसम्म सडक बन्द गरिने कार्यालयले जनाएको छ । यसअघि बिहान ११ बजेदेखि अपराह्न ३ बजेसम्म सडक बन्द गरिँदै आएकोमा काठमाडौँबाट बाहिरिने हजारौँ सवारीका लागि समय असहज भएकाले भन्ने यातायात व्यवसायीहरुको गुनासो आएपछि समय परिवर्तन गरिएको आयोजना कार्यालयका किरण कार्कीको भनाइ छ ।

सडक बन्द गर्ने बारे गृहमन्त्रालयमा समेत छलफल भएको र सोही निर्णय अनुसार अघि बढ्न लागेको उनले बताए । आजै ९शुक्रबार० देखि एक महिनासम्म दैनिक ४ घण्टा सो सडकखण्ड बन्द रहनेछ । तर बन्द भएका बेला पनि अत्यावश्यक सवारी, एम्बुलेन्स लगायत पैदलयात्री भने आवागमन गर्न पाउनेछन् ।

हाल चार स्थाानमा पुल निर्माणको काम भइरहेको छ । सिमलताल पुल र कालीखोला पुल निर्माण गरिने स्थानमा पहाड काटेर सकिएको छ भने तुइनखोला पुल र चिसेन्जीखोला पुल निर्माण गरिने ठाउँमा पहाड काट्ने काम अझै बाँकी रहेको जनाइएको छ ।