वैशाख १० मा सार्वजनिक बिदा दिन निर्वाचन आयोगले सरकारसँग अनुरोध गरेको छः सहप्रवक्ता

काठमाडौं । निर्वाचन आयोगका सहप्रवक्ता सूर्यप्रसाद अर्यालले तीन क्षेत्रमा हुने उपनिर्वाचनको सम्पूर्ण तयारी पूरा भएको बताएका छन् ।
‘वैशाख १ देखि ७ सम्म प्रत्येक वडामा दुईजना स्वयंसेवक पठाएर मतदाता शिक्षा सम्पन्न भएको छ । मतदान स्थलमा मतदान सामग्री पुगिसकेका छन् । मतदान अधिकृत, सहायक मतदान अधिकृत पुगिसकेका छन् । आजबाट मदिरा बिक्रीवितरण र हातहतियार बोकेर हिँड्न नपाइने सूचना टाँस भइसकेको छ । आज र भोलि सर्वपक्षीय बैठक राखेर निर्वाचनलाई स्वच्छ र विश्वसनीय बनाउने काम हुन्छ,’ नेपाली रेडियो नेटवर्क ९एनआरएन० को कार्यक्रम ‘नेपाली बहस’का लागि पत्रकार ऋषि धमलासँग संवाद गर्दै अर्यालले भने ।

हिजो रातिबाट स्थिर समय सुरु भएकाले आचारसंहितामा कडाइ गरिएको पनि उनले बताए । उनले भने, ‘उम्मेदवारहरुलाई प्रचारप्रसारको समय बिहीबार रातिसम्म थियो । अब स्थिर समय सुरु भएको छ । निर्वाचनलाई स्वतन्त्र र निष्पक्ष रुपमा सम्पन्न गर्न यो अवधि महत्तवपूर्ण छ । यस अवधिमा के गर्न हुन्छ, के गर्न हुँदैन भन्ने आचारसंहितामा स्पष्ट छ ।’

लोकतन्त्रको मेरुदण्ड मानिएको निर्वाचनलाई स्वस्थ बनाउन वचनले मात्र नभई व्यवहारबाट अनुभूत हुनुपर्ने सहप्रवक्ता अर्यालले बताए । उनले भने, ‘आचारसंहिताविपरीतका क्रियाकलाप लोकतन्त्रका भाइरस हुन् । यसले लोकतन्त्रलाई रोगी बनाउँछ । त्यसबारे सजग र सचेत हुन स्थानीय प्रशासनलाई निर्देशन दिइएको छ । स्थानीय प्रशासनलाई त्यस्ता गतिवधि रोक्ने, पक्राउ गर्ने र जफत गर्ने अधिकार छ ।’ आयोगले सहसचिवको नेतृत्वमा तीनवटै उपनिर्वाचन क्षेत्रमा केन्द्रीय आचारसंहिता टोली खटाएका पनि उनले जानकारी दिए ।

सामाजिक सञ्जालमा पनि निर्वाचन आयोगले निगरानी बढाएको अर्यालले बताए । उनले थपे, ‘सामाजिक सञ्जालमा कसैको पक्षमा मत माग्दै पोस्ट गर्ने, लाइक र कमेन्ट गर्न पाइँदैन । बैठक, आमसभा, कोणसभा, अन्तर्क्रिया र छलफल गर्न पाइँदैन । सामाजिक सञ्जालमा अनेपक्षित गतिविधि गर्न हुँदैन । नागरिकको चेतनास्तर बढेकाले पनि त्यस्ता गतिविधि हुँदैनन् भन्ने अपेक्षा छ ।’

तीनवटै क्षेत्रको उपनिर्वाचनका कारण सरकारलाई वैशाख १० गते सार्वजनिक बिदा दिन माग गरेको पनि उनले बताए । सहप्रवक्ता अर्यालले भने, ‘यातायातलाई व्यवस्थित गर्न र शान्ति सुरक्षाका लागि पनि सार्वजनिक बिदा आवश्यक हुन्छ । हामीले तीनवटै तहका सरकारलाई बिदाका लागि अनुरोध गरेका छौं ।’