मोरङमा खुकुरी देखाएर लुटपाट

विराटनगर । मोरङको पथरी शनिश्चरे नगरपालिका–१ मा खुकुरी देखाएर शनिबार साँझ एक जना व्यक्तिमाथि लुटपाट गरिएको छ । प्रहरीका अनुसार पथरी–जाँते भित्री सडकखण्डको जंगलमा लेटाङ नगरपालिका–८ का ३७ वर्षीय ओमप्रकाश रानामगर साँझ साढे ५ बजेतिर लुटिएका हुन् ।

पथरी बजारबाट प्लम्बिङको सामान लिएर मोटरसाइकलमा घरतर्फ जाँदै गरेका मगरमाथि ५ जनाको समूहले लुटपाट गरेको प्रहरीले जनाएको छ । रानामगरले आफ्नो साथमा रहेको ओपो मोबाइल र ४ हजार रूपैयाँ नगद लुटिएको जानकारी प्रहरीलाई गराएका थिए ।

घटनाका बारेमा प्रहरीले राति ८ बजेतिर खबर पाएको हो । घटनामा संलग्नको हालसम्म पहिचान खुलेको छैन । पक्राउ पनि परेका छैनन् । प्रहरीका अनुसार घटनामा संलग्नमध्ये ३ जनाले लुटपाट गरेको र २ जनाले ‘रेकी’ गरेको हुन सक्छ ।

इलाका प्रहरी कार्यालय पथरीका अनुसार घटनामा संलग्नको खोजी तीव्र पारिएको छ । प्राप्त सूचना र हुलियाका आधारमा सबैतिर प्रहरी परिचालन गरेर लुटेरा समूहको खोजी भइरहेको प्रहरीले जनाएको छ ।