रास्वपाले गर्‍यो पत्रकार कुट्ने जिल्ला संयोजकको निलम्बन फुकुवा

काठमाडौं । राष्ट्रिय स्वतन्त्र पार्टीले निलम्बित बझाङ जिल्ला संयोजक नगेन्द्र खड्कामाथिको निलम्बन फुकुवा गरेको छ।

गत साउन ८ गते खड्काले बझाङका एक पत्रकारलाई कुटेपछि विवादमा तानिएका थिए । रास्वपाले पत्रकार कुटेको घटना सार्वजनिक भएपछि साउन ९ गते उनलाई संयोजकको जि म्मेवारीबाट निलम्बन गरेको थियो ।

पार्टीले गरेको छानविनका क्रममा खड्का दोषी नदेखिएकाले पदमा पुर्नबहाली गरिएको रास्वपाले जनाएको छ ।

बझाङको सामुदायिक खप्तड आवाज र नेपाल एगल अनलाइनमा कार्यरत पत्रकार सुनिल मण्डेललाई घरबाटै साउन ८ गते खड्काले अपहरण गरेका र होटल होलि डे इनमा लगेर कुटपिट गरेका थिए ।

खड्का स्वयं उक्त होटलका सञ्चालक हुन्। खड्काको निर्देशनमा मण्डेललाई अपहरण गरी आक्रमण गरेको भन्दै नेपाल पत्रकार महासंघ बझाङ शाखा र प्रेस चौतारी नेपाल बझाङले कारवाहीको मागसहित विज्ञप्ति जारी गरेका थिए ।

साउन ९ गते पत्रकार महासंघ बझाङ शाखाका अध्यक्ष शैलेन्द्र रोकाया र प्रेस चौतारीका तर्फबाट सहसचिव सुरेश धामीले छुट्टा छुट्टै विज्ञप्ति जारी गर्दै प्रेस विरोधी कार्यको भर्त्सना गरेका थिए ।