३४ वर्षीय श्रीमानले गरे २२ वर्षीया श्रीमतीको हत्या

कञ्चनपुर । कञ्चनपुरमा आफ्नै श्रीमतीको हत्या गरेको आरोपमा एक जना पक्राउ परेका छन् । जिल्लाको दोधारा चाँदनी नगरपालिका–७ कञ्चभोजका ३४ वर्षीय प्रेमबहादुर बुढा क्षेत्रीलाई श्रीमतीको हत्या गरेको आरोपमा पक्राउ गरिएको हो ।

शुक्रबार राति ११ बजे उनले तरकारी काट्ने चक्कु प्रहार गरी २२ वर्षीया द्रोपती बुढा क्षेत्रीको हत्या गरेको जिल्ला प्रहरी कार्यालय कञ्चनपुरका प्रवक्ता प्रकाश डाँगीले बताए । गम्भीर घाइते द्रोपतीलाई उपचारको लागि प्रहरीले प्राथमिक स्वास्थ्य केन्द्र दोधारा पठाए पनि उनलाई डाक्टरले मृत घोषणा गरेका हुन् ।

घरायसी विवादमा उनले चक्कु प्रहार गरी श्रीमतीको हत्या गरेको प्रवक्ता डाँगीले बताए । उनलाई पक्राउ गरी घटनाका सम्बन्धमा थप अनुसन्धान भइरहेको छ ।