काठमाडौं । अमेरिकाको न्यूयोर्कमा विश्व आदिवासी दिवस भव्यताका साथ मनाइएको छ । २९ औं विश्व आदिवासी दिवसको अवसरमा नेपाल आदिवासी जनजाति महासंघ अमेरिका (फिप्ना) ले शनिबार न्यूयोर्कमा झाँकी सहितको ऱ्याली कार्यक्रम भब्यरुपमा सम्पन्न गरेको हो ।

राई, लिम्बु, गुरुङ, ह्योल्मो, मगर, तामाङ, मुस्ताङ, नेवार, थारु लगायतका जातिय संस्थाहरुले आ(आफ्नो संस्थागत ब्यानर र जातीय भेषभुषामा आकर्षक रुपमा झाँकी प्रदर्शन गरेर आफ्नो जातिय पहिचान र संस्कृतिको जगेर्ना र सम्बर्द्धन गर्ने काम गरेका छन् ।

नेपाली समुदायको उल्लेख्य जनसहभागितामा सो ऱ्याली नेपाल डे परेडको झल्को आउने गरी भव्यताका साथ सम्पन्न भएको थियो । सो आकर्षक ऱ्याली न्यूयोर्कमा रहेका विभिन्न मुलुकका मानिसहरुले रुचीपूर्वक अवलोकन गरेका थिए ।

कार्यक्रममा नेपाल सरकारको तर्फबाट न्यूयोर्क स्थित नेपाली महावाणिज्य दूतावासका वाणिज्यदूत गणेश अधिकारी समेत न्यूयोर्क सिटी काउन्सिलका मेम्बरहरु, विभिन्न संघ संस्थाका प्रतिनिधि, समाजसेवी र आम समुदायको उपस्थिति रहेको थियो ।