रौतहट । रौतहटको उत्तरीपूर्वी भेगमा रहेको धार्मिक तथा प्राकृतिक पर्यटकिय स्थल नुनथरमा अङ्ग्रेजी नयाँ वर्षमा आन्तरिक र बाह्य पर्यटकको चहलपहल बढेको छ । जिल्लाको चन्द्रपुर नगरपालिका वडा नम्बर १ रहेको नुनथर प्रदेश नम्बर २ कै चर्चित पर्यटक स्थलको रुपमा परिचित रहेको छ ।
नयाँ वर्ष मनाउन स्वदेश र छिमेकी मुलुक भारतका विभिन्न प्रान्तबाट सो क्षेत्रमा आउने पर्यटकहरुको व्यापक घुइचो लागेको हो । शनिबारको दिन पिकनिक खान र घुम्न रौतहट जिल्लाका मात्र नभएर छिमेकी जिल्ला बारा, पर्सा, मकवानपुर, सर्लाही, महोत्तरी, धनुषा, सिन्धुली जिल्लाहरुका मानिसहरु पनि आउने गरेका छन् ।
त्यसैगरी विभिन्न संघ संस्था प्रतिनिधी तथा विद्यालयका शिक्षक विद्यार्थीहरु ठूलो संख्यामा पिकनिक खान आउने गरेका छन् । सो स्थानमा बिहे, ब्रतबन्ध लगायतका धार्मिक कार्यहरु गर्नेको संख्यामा पनि पछिल्लो समयमा वृद्धि भएको छ ।
