हुस्सुले बाटो नदेख्दा दुई मोटरसाइकल ठोक्किँयो, दुई जनाको निधन

महोत्तरी । बाक्लो हुस्सु लागेका कारण विपरीत दिशाबाट आएका दुई मोटरसाइकल आपसमा ठोक्किँएर महोत्तरीको औरहीमा दुर्घटना भएको छ । तीव्र गतिमा रहेका चालकले एकअर्कालाई नदेख्दा भएको दुर्घटनामा दुई जनाको मृत्यु भएको छ ।

बर्दिबास–जलेश्वर सडक खन्डमा दुई मोटरसाइकल एकआपसमा ठोक्किँदा दुवै मोटरसाइकल चालकको मृत्यु भएको र पछाडि सवार दुई जना गम्भीर घाइते भएको इलाका प्रहरी कार्यालय गौशालाले जनाएको छ ।

औरही नगरपालिका–१ वडा कार्यालय नजिक सोमबार राति ९ बजे बर्दिबासबाट रामगोपालपुर तर्फ जाँदै गरेको प्रदेश २–०२–००४ प १८४० नम्बरको पल्सर मोटरसाइकल र रामगोपालपुरबाट बर्दिबास तर्फ आउँदै गरेको ज ११ प ८०९९ नम्बरको डिस्कभर मोटरसाइकल ठोक्किँएर दुर्घटना भएको हो ।

दुर्घटनामा पल्सर मोटरसाइकल चालक रामगोपालपुर नगरपालिका थली विर्ताका ३० वर्षीय मुकेश चमार र डिस्कभर मोटरसाइकल चालक भंगहा नगरपालिका ३ का ३२ वर्षीय धर्मेन्द्र महतोको मृत्यु भएको हो ।

दुर्घटनामा परेर गम्भीर घाइते भएका दुवै जनालाई उपचारका लागि बर्दिबासस्थित शुभस्वस्तिक अस्पताल लगिएको छ। गम्भीर घाइते दुवै जनाको केहिबेरमै मृत्यु भएको प्रहरीले जनाएको छ ।